ទីបំផុតស្គាល់ឈ្មោះ និងអាយុខ្មាន់កាំភ្លើងបាញ់លោក Abe

ប៉ូលិសជប៉ុនបានចាប់ខ្លួនខ្មាន់កាំភ្លើងម្នាក់ឈ្មោះ Yamagami Tetsuya អាយុ ៤១ ឆ្នាំ បន្ទាប់ពីបានបាញ់ប្រហារលើលោក Shinzo Abe នៅជិតស្ថានីយ៍ Yamatosaidaiji ក្នុងទីក្រុង Nara ភាគខាងលិចប្រទេសជប៉ុន ។

ទន្ទឹមនោះប៉ូលិសក៏បានចោទប្រកាន់ខ្មាន់កាំភ្លើងពីបទប៉ុនប៉ងមនុស្សឃាត និង​បានដកហូតកាំភ្លើង​មួយ​ដើមផងដែរ ក្រោយការកើតហេតុនៅវេលាម៉ោង ១១ និង ៣០ នាទីព្រឹក ។

ស្របពេលជាមួយគ្នានេះដែរ សារព័ត៌មាន NHK បានរាយការណ៍ថា អតីតនាយករដ្ឋមន្ត្រីជប៉ុនលោក Shinzo Abe កំពុងស្ថិតក្នុងស្ថានភាពធ្ងន់ធ្ងរខ្លាំងមែនទែន ដោយសារតែបាត់បង់សញ្ញាជីវិតទៅហើយ ។

គួរបញ្ជាក់ថា លោក Abe វ័យ ៦៧ ឆ្នាំត្រូវខ្មាន់កាំភ្លើងបាញ់ប្រហារចំដើមទ្រូង ខណៈលោកកំពុងថ្លែងសុន្ទរកថាលើដងផ្លូវនៅព្រឹកថ្ងៃសុក្រនេះដើម្បីប្រមូលការគាំទ្រចំពោះបេក្ខជនគណបក្សសេរីប្រជាធិបតេយ្យ (LDP) មុនការបោះឆ្នោតសភាជាន់ខ្ពស់ ដែលនឹងប្រព្រឹត្តិទៅនៅថ្ងៃអាទិត្យនេះ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ NHK ចុះផ្សាយថា លោក Abe ស្ថិតក្នុងស្ថានភាពធ្ងន់ធ្ងរខ្លាំងមែនទែន