កម្ពុជា ស្នើចិនពង្រីកកិច្ចសហប្រតិបត្តិការ​អាកាសចរស៊ីវិល

លោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល បានស្នើដល់ភាគីចិន ពិនិត្យលទ្ធភាពក្នុងការស្តារ និងបង្កើនចំនួនជើងហោះហើរត្រង់ ឱ្យបានឆាប់រហ័សឡើងវិញ ដូចតាមការ​ចង់បានរបស់ថ្នាក់ដឹកនាំកំពូលនៃប្រទេសទាំងពីរ ព្រមទាំងពង្រឹង និងពង្រីកបន្ថែមទៀត លើកិច្ចសហ​ប្រតិបត្តិការវិស័យអាកាសចរស៊ីវិល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោករដ្ឋមន្រ្តីស្នើបែបនេះ នៅក្នុងជំនួបសម្តែងការគួរសមជាមួយជាមួយលោក Captain Song Zhiyong ប្រធានរដ្ឋបាលអាកាសចរស៊ីវិលចិន និងបានចុះហត្ថាលេខាលើកិច្ចព្រមព្រៀងកិច្ចសហប្រតិបត្តិបត្តិការ ស្តីពីការពង្រឹងសុវត្ថិភាពហោះហើរ នៅទីក្រុងប៉េកាំង ប្រទេសចិន កាលថ្ងៃទី២៥ ខែមេសា ឆ្នាំ២០២៣។ នេះបើតាមការបញ្ជាក់របស់លោក ស៊ិន ចាន់សេរីវត្ថា អ្នកនាំពាក្យអាកាសចរស៊ីវិល។

ថ្លែងប្រាប់កម្ពុជាថ្មី អ្នកនាំពាក្យអាកាសចរស៊ីវិល បានលើកឡើងថា មុនពេលវិបត្តិជំងឺកូវីដ-១៩ ការហោះហើរដឹក​ជញ្ជូនអ្នកដំណើរតាមផ្លូវអាកាស រវាងប្រទេសទាំងពីរ មានចំនួនជាង ៤០០ជើង ក្នុងមួយសប្តាហ៍ និងបានផ្សារ​ភ្ជាប់ទំនាក់ទំនង៤០ទីក្រុង រវាងកម្ពុជា ៣ទីក្រុង និងចិន ៣៧ទីក្រុង ដោយមានក្រុមហ៊ុនអាកាសចរណ៍ហោះហើរចំនួន ២២។ ប៉ុន្តែដោយសារវិបត្តិជំងឺកូវីដ-១៩ ការផ្លាស់ប្តូរ និងបញ្ហាប្រឈមនានាយ៉ាងខ្លាំងក្លា នៅក្នុងពិភពលោក ដំណើរ​ការចាប់ផ្តើមហោះហើរត្រង់ឡើងវិញ រវាងប្រទេសទាំងពីរ មិនទាន់បានសម្រេចតាមគោលបំណងនៅឡើយ ដោយស្ថិតនៅត្រឹមប្រហែល ១០០ជើងក្នុងមួយសប្តាហ៍ និង ១១ក្រុមហ៊ុនអាកាសចរណ៍ ក្នុងនោះ ៣ក្រុមហ៊ុន ពីកម្ពុជា និង ៨ក្រុមហ៊ុន ពីចិន។

លោក ស៊ិន ចាន់សេរីវត្ថា បានគូសបញ្ជាក់ថា បើតាមផែនការរបស់ក្រុមហ៊ុនអាកាសចរណ៍នៃប្រទេសទាំងពីរ ដែលបាន​ដាក់​ពាក្យស្នើសុំហោះហើរសម្រាប់រដូវកាលនេះ គឺមានរហូតដល់ទៅប្រមាណ​​ជាង ៣០០ជើង ក្នុងមួយសប្តាហ៍ ប៉ុន្តែលទ្ធផល​ជាក់ស្តែង គឺពុំអាចសម្រេចបាននៅឡើយ។

បើតាមលោក ស៊ិន ចាន់សេរីវត្ថា កម្ពុជា ស្វាគមន៍យ៉ាងកក់ក្តៅដល់ប្រទេសចិន ដោយបេ្តជ្ញាផ្តល់សេវាកម្ម និងសន្តិសុខ នៃអ្នកដំណើរតាមផ្លូវអាកាសទៅមក រវាងចិននិងកម្ពុជា​ ប្រកបដោយគុណភាពខ្ពស់។

ជាមួយគ្នានេះ លោករដ្ឋមន្ត្រី ម៉ៅ ហាវណ្ណាល់ ក៏បានស្នើចិន ជួយផ្តល់អាហារូបករណ៍រយៈពេលវែងលើមុខវិជ្ជា ​វិស្វកម្មឧតុនិយមអាកាសចរណ៍ (Aeronautical Meteorology Engineering) ចំនួន ៤នាក់ វិស្វកម្មអាកាសយានដ្ឋាន (Airport Engineering) ចំនួន ៤នាក់ និងអាកាសយានិក​ (Commercial Pilots) ចំនួន ២នាក់ផងដែរ។

តាមរយៈសេចក្តីថ្លែងការណ៍រួម ចិនបានប្រកាសថា កម្ពុជា​​ជាប្រទេសមួយក្នុងចំណោមប្រទេសដំបូង ដែលនឹងទទួលភ្ញៀវទេសចរចិន ព្រមទាំងផ្តល់អាទិភាពក្នុងការស្តារ និងបង្កើនចំនួនជើងហោះហើរ​ត្រង់រវាងប្រទេសទាំងពីរ៕