លោក បៃដិន ដាក់លិខិតស្នើសុំលុយសភា ១៣ ពាន់លានដុល្លារបន្ថែមទៀត ទុកជួយ អ៊ុយក្រែន នៅឆ្នាំក្រោយ

ប្រធានាធិបតីសហរដ្ឋអាមេរិកលោក ចូ បៃដិន បានដាក់លិខិតមួយច្បាប់ទៅកាន់សភា ដើម្បីស្នើសុំថវិកាចំនួន ១៣ ពាន់លានដុល្លារបន្ថែមទៀត ទុកសម្រាប់បន្តផ្ដល់ជំនួយយោធាដល់រដ្ឋាភិបាលអ៊ុយក្រែននៅឆ្នាំក្រោយ ។

នៅក្នុងលិខិតនោះបាននិយាយថា “ក្នុងចំណោមថវិកាទាំង ១៣ ពាន់លានដុល្លារនោះ គឺ ៩.៥ ពាន់លានដុល្លារសម្រាប់ផ្ដល់ឧបករណ៍យោធាដល់អ៊ុយក្រែន និងការបំពេញអាវុធបន្ថែមចូលទៅក្នុងស្តុកក្រសួងការពារជាតិអាមេរិក ខណៈនៅសល់ ៣.៦ ពាន់លានដុល្លារ គឺសម្រាប់ការបន្តគាំទ្រផ្នែកយោធា ការស៊ើបការណ៍សម្ងាត់ និងផ្នែកការពារផ្សេងទៀតជាដើម” ។

ទន្ទឹមនោះ លោក បៃដិន ក៏កំពុងស្នើសុំជំនួយចំនួន ៧.៣ ពាន់លានដុល្លារបន្ថែមទៀតផងដែរ សម្រាប់ជំនួយផ្នែកសេដ្ឋកិច្ច មនុស្សធម៌ និងសន្តិសុខដល់អ៊ុយក្រែន ហើយបើបូកសំណើបន្ថែមនេះទៀត នោះជំនួយនឹងមានចំនួនសរុបជាង ២០ ពាន់លានដុល្លារ ។

ទោះបីជាយ៉ាងណាក៏ដោយ រួមផ្សំជាមួយនឹងថវិកាបន្ថែមចំនួន ២.៦៥ ពាន់លានដុល្លារសម្រាប់សន្តិសុខព្រំដែន, ១២ ពាន់លានដុល្លារសម្រាប់កិច្ចខិតខំប្រឹងប្រែងសង្គ្រោះគ្រោះមហន្តរាយ និង ៤១៦ លានដុល្លារក្នុងការប្រយុទ្ធប្រឆាំងនឹងវិបត្តិ​ថ្នាំ​ហ្វេតានីល (fentanyl) ក៏ដូចជាក្នុងចំណោមបញ្ហាក្នុងស្រុកផ្សេងទៀត នោះសំណើរបស់សភានឹងមានចំនួនលើសពី ៤០ ពាន់លានដុល្លារឯណោះ ។

គួរបញ្ជាក់ថា រហូតមកដល់ពេលនេះ សហរដ្ឋអាមេរិកបានផ្តល់ជំនួយដល់អ៊ុយក្រែនជាង ១០០ ពាន់លានដុល្លារមកហើយ ចាប់តាំងពីផ្ទុះសង្គ្រាមលុកលុយរបស់រុស្ស៊ីទៅលើរដ្ឋាភិបាលទីក្រុងកៀវកាលពីថ្ងៃទី២៤ ខែកុម្ភៈ ខណៈជំនួយទាំងនោះ ភាគច្រើនគឺជាឧបករណ៍យោធា ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ លោក បៃដិន ប្រកាសអាសន្ននៅ ហាវ៉ៃ ខណៈមនុស្សស្លាប់ដោយសារភ្លើងឆេះព្រៃ កើនដល់ ៥៣នាក់