ប្រព័ន្ធលូរំដោះទឹកស្អុយប្រវែងជិត ១គីឡូម៉ែត្រ ត្រូវបានអាជ្ញាធរខេត្តកោះកុងស្ថាបនាឡើង

អាជ្ញាធរខេត្តកោះកុង បានស្ថាបនាប្រព័ន្ធលូរំដោះទឹកជំនន់ ឬទឹកស្អុយចេញពីក្រុងខេមភូមិន្ទ ប្រវែងជិត ១គីឡូម៉ែត្រ ដើម្បីបញ្ចៀសការជន់លិច។

លោកស្រី មិថុនា ភូថង អភិបាលខេត្តកោះកុង និងមន្រ្តីជំនាញ បានសម្រេចលើកគម្រោងសាងសង់ពង្រីកបណ្តាញលូមូលរំដោះ ដែលមានអង្គត់ផ្ចិត ០.៨០ និងប្រវែងជិត ១គីឡូម៉ែត្រ ផ្តើមចេញពីកែងផ្លូវសាខាកាកបាទក្រហមកម្ពុជាខេត្ត ឆ្ពោះទៅប្រឡាយអបក្បែរអតីតព្រលានយន្តហោះ។

លោក វ៉ែន សុខា នាយកទីចាត់ការផែនការ និងវិនិយោគខេត្តកោះកុង លើកឡើងនៅថ្ងៃទី ១៥ ខែសីហា ឆ្នាំ ២០២៣ថា គម្រោងធ្វើប្រព័ន្ធលូនេះ ស្ថិតនៅសង្កាត់ស្មាច់មានជ័យ ក្រុងខេមរភូមិន្ទ ដោយបានគិតគូរយកចិត្តទុកដាក់ជាយូរណាស់ មកហើយ ដើម្បីរំដោះទឹកជំនន់ ឬទឹកស្អុយទៅកាន់ប្រឡាយធម្មជាតិ ជៀសវាងការជន់លិចក្នុងមូលដ្ឋាន។

លោក វ៉ែន សុខា ក៏បានឲ្យដឹងទៀតថា សម្រាប់ឆ្នាំ ២០២៣នេះដែរ អាជ្ញាធរខេត្ត ក៏មានចាក់បេតុងចិញ្ចើមផ្លូវបន្ថែមប្រវែង ៣១៧ម៉ែត្រ ទទឹង ៣៤ម៉ែត្រ កម្រាស់ ០.១៥ម៉ែត្រផងដែរ ក្រោយពេលធ្វើប្រព័ន្ធលូរួចរាល់ហើយ។

គួរកត់សម្គាល់ថា មូលដ្ឋានសង្កាត់ទាំង ៣ ក្នុងក្រុងខេមភូមិន្ទ មានប្រឡាយធម្មជាតិចំណុចតំបន់ខ្លះមិនត្រូវបានស្តារបើកផ្លូវទឹក ដើម្បីសម្រួលផ្លូវទឹកហូរបានល្អនៅឡើយទេ។ រីឯតំបន់ខ្លះទៀត រងការជីកកាយលុបធ្វើជាកម្មសិទ្ធិក៏មាន ដែលបង្កឲ្យមានជន់លិចពេលភ្លៀងធ្លាក់ច្រើន។

បញ្ហានេះពលរដ្ឋ ក៏សំណូមពរដល់អាជ្ញាធរក្រុងខេមរភូមិន្ទ រដ្ឋបាលខេត្ត និងមន្ទីរជំនាញពាក់ព័ន្ធបង្កើនតាមត្រួតពិនិត្យនូវខាងលើប្រឈមខាងលើ និងមានវិធានការស្តារប្រឡាយធម្មជាតិឲ្យបានច្រើន៕

អត្តបទ៖ សិរីវឌ្ឍនៈ