ព័ត៌មានជាតិ

ឯកឧត្ដម ហ៊ុន ម៉ានី ៖ វេទិកាកម្ពុជា ៤.០ បញ្ជ្រាបការយល់ដឹងបច្ចេកវិទ្យាជាដំណោះស្រាយ ជួយដល់សេដ្ឋកិច្ច-សង្គម

បានផុស

៣ years មុន

នៅ

ថ្ងៃអង្គារ ១៩ កញ្ញា ២០២៣

ដោយ

ឯកឧត្ដម ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងជាប្រធានក្រុមប្រឹក្សាភិបាល នៃមជ្ឈមណ្ឌលកម្ពុជា ៤.០ លើកឡើងថា វេទិកាកម្ពុជា ៤.០ ជាការបង្ហាញនូវការយកចិត្តទុកដាក់ ការចូលរួមជំរុញ បំផុសផ្សព្វផ្សាយ និងបញ្ជ្រាបការយល់ដឹងឲ្យកាន់តែទូលំទូលាយអំពីការប្រើប្រាស់បច្ចេកវិទ្យាជាដំណោះស្រាយ ដើម្បីទទួលបានជាប្រយោជន៍វិជ្ជមានជួយដល់សេដ្ឋកិច្ច និងសង្គម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងនេះ ក្នុងឱកាស ឯកឧត្ដម ហ៊ុន ម៉ានី ប្រធានក្រុមប្រឹក្សាភិបាល នៃមជ្ឈមណ្ឌលកម្ពុជា ៤.០ បានអញ្ជើញជាអធិបតីក្នុងវេទិកាកម្ពុជា ៤.០ លើកទី ១ ស្ដីពី “យុវជន ៤.០” នៅមជ្ឈមណ្ឌលម៉ានី អគារ The Kampus នាព្រឹកថ្ងៃទី ១៩ ខែកញ្ញា ឆ្នាំ ២០២៣ នេះ។

នាឱកាសនោះ ឯកឧត្ដម ហ៊ុន ម៉ានី បានលើកឡើងថា «វេទិកានាថ្ងៃនេះ គឺជាការបង្ហាញនូវការយកចិត្តទុកដាក់ និងការចូលរួមក្នុងការជំរុញ និងបំផុសផ្សព្វផ្សាយ បញ្ជ្រាបការយល់ដឹងឲ្យកាន់តែទូលំទូលាយអំពីការប្រើប្រាស់បច្ចេកវិទ្យាជាដំណោះស្រាយ ដើម្បីទទួលបានជាប្រយោជន៍វិជ្ជមាន ជួយដល់សេដ្ឋកិច្ច និងសង្គម»។

ជាមួយគ្នានេះដែរ ឯកឧត្ដម ហ៊ុន ម៉ានី ក៏បានសម្ដែងនូវសេចក្ដីសោមនស្ស និងថ្លែងអំណរគុណ ចំពោះអ្នកចូលរួម ដែលអញ្ជើញមកពីក្រសួង ស្ថាប័នពាក់ព័ន្ធ គ្រឹះស្ថានសិក្សា វិស័យឯកជន និងប្អូនៗ យុវជន ផងដែរ។

គួរជម្រាបថា វេទិកានេះ ត្រូវបានធ្វើឡើងក្នុងគោលបំណង ដើម្បីប្រមូលផ្ដុំអ្នកជំនាញ និងភាគីពាក់ព័ន្ធ រួមមាន អ្នកជំនាញមកពីវិស័យរដ្ឋ ឯកជន និងអង្គការក្រៅរដ្ឋាភិបាល ដើម្បីពិភាក្សា ផ្លាស់ប្ដូរយោបល់ និងចែករំលែកទស្សនៈ ជុំវិញប្រធានបទសំខាន់ៗ ទាក់ទងនឹងការកសាងសេដ្ឋកិច្ច សង្គមឌីជីថល ដោយប្រធានបទ នៃកិច្ចពិភាក្សានៅក្នុងវេទិកាកម្ពុជា ៤.០ លើកទី ១ ផ្ដោតសំខាន់លើប្រធានពីរ គឺ «យុវជន និងការអប់រំឌីជីថល, ជំនាញឌីជីថល និងអាជីពឌីជីថល» និង « ការប្រើប្រាស់បច្ចេកទេសបច្ចេកវិទ្យា និងសុខភាពផ្លូវចិត្តរបស់យុវជន»។

សូមបញ្ជាក់ថា វេទិកានេះមានការអញ្ជើញចូលរួមពីសំណាក់ ឯកឧត្ដម លោកជំទាវ អ្នកឧកញ៉ា លោក លោកស្រី ជាតំណាងមកពីក្រសួង ស្ថាប័នពាក់ព័ន្ធ គ្រឹះស្ថានសិក្សា វិស័យឯកជន និងយុវជន សរុបប្រមាណ ២៧០ នាក់៕

អត្ថបទ ៖ ពិសី