សេដ្ឋកិច្ច

G7 គ្រោងជួបពិភាក្សាអំពីហានិភ័យពាណិជ្ជកម្មសកល ក្រោយអាមេរិកដាក់ពន្ធធ្ងន់ធ្ងរលើចិន

បានផុស

២ years មុន

នៅ

ថ្ងៃពុធ ១៥ ឧសភា ២០២៤

ដោយ

រដ្ឋមន្ត្រីក្រសួងសេដ្ឋកិច្ចអ៊ីតាលី លោក ចៃអិនខារឡូ ជីអរហ្គេទី (Giancarlo Giorgetti) បានឱ្យដឹងកាលពីថ្ងៃអង្គារថា ក្រុមប្រទេសអភិវឌ្ឍន៍ទាំង៧ (G7) គ្រោងនឹងជួបពិភាក្សាគ្នានៅសប្ដាហ៍ក្រោយ អំពីហានិភ័យនៃពាណិជ្ជកម្មសកល ក្រោយសហរដ្ឋអាមេរិកប្រកាសដាក់ពន្ធយ៉ាងធ្ងន់ធ្ងរលើចិន។ នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ជីអរហ្គេទី និយាយប្រាប់អ្នកសារព័ត៌មាននៅទីក្រុងមីឡង់ ថា កិច្ចប្រជុំ G7 នឹងប្រព្រឹត្តទៅនៅថ្ងៃទី ២៤-២៥ ខែឧសភានេះ នៅទីក្រុងStresa ភាគខាងជើងនៃប្រទេសអ៊ីតាលី ដោយមានការចូលរួមពីរដ្ឋមន្រ្តីហិរញ្ញវត្ថុពីគ្រប់សមាជិករបស់ប្លុក ដែលពួកគេនឹងពិភាក្សាគ្នា អំពី «ការបែកបាក់នៃពាណិជ្ជកម្មពិភពលោក ជាមួយនឹងវិធានការដ៏តឹងតែងចុងក្រោយរបស់រដ្ឋាភិបាលដោយរដ្ឋាភិបាលអាមេរិកប្រឆាំងនឹងប្រទេសចិន»។

រដ្ឋមន្រ្តីដដែលបន្តថា៖ «សង្រ្គាមពាណិជ្ជកម្មកំពុងដំណើរការ ដែលឆ្លុះបញ្ចាំងពីភាពតានតឹងភូមិសាស្ត្រនយោបាយ» ហើយអឺរ៉ុបនៅតែត្រូវការបង្ហាញពីតួនាទីរបស់ខ្លួនក្នុងសេណារីយ៉ូផ្លាស់ប្ដូរបែបនេះ។

គួរគូសបញ្ជាក់ថា ក្រោមភាពតានតឹងពាណិជ្ជកម្មជាថ្មី ប្រធានាធិបតីអាមេរិកលោក ចូ បៃដិន កាលពីថ្ងៃអង្គារ បានប្រកាសពីការដំឡើងពន្ធដ៏ច្រើនសន្ធឹកសន្ធាប់លើទំនិញនាំចូលពីចិន រួមមានអាគុយរថយន្តអគ្គិសនី (EV) បន្ទះឈីប ផលិតផលវេជ្ជសាស្រ្ត ដែកថែប និងរ៉ែសំខាន់ៗផ្សេងទៀត។

ចំណាត់ការធ្វើឡើង ក្នុងគោលបំណងលើកទឹកចិត្តប្រទេសចិនឱ្យ «លុបបំបាត់ការអនុវត្តពាណិជ្ជកម្មមិនភាពគ្នារបស់ខ្លួន ទាក់ទងនឹងការផ្ទេរបច្ចេកវិទ្យា កម្មសិទ្ធិបញ្ញា និងការច្នៃប្រឌិតជាដើម»។ ចិនដែលចោទថា ចំណាត់ការអាមេរិករំលោភលើច្បាប់របស់អង្គការពាណិជ្ជកម្មពិភពលោក បាននិយាយថា ខ្លួននឹងឆ្លើយតបគ្រប់មធ្យោបាយចាំបាច់ ដើម្បីការពារផលប្រយោជន៍របស់ខ្លួន៕