រន្ទះបាញ់ផ្ដាច់ជីវិតមនុស្សម្នាក់ និងគោមួយក្បាល នៅបាត់ដំបង

ភ្លៀងពីរមេនៅជាប់ខ្សែបន្ទាត់ព្រំដែនថៃ ខេត្តបាត់ដំបង ត្រូវបានរន្ទះបាញ់សម្លាប់ប្រជាពលរដ្ឋម្នាក់ និងសត្វគោមួយក្បាល កាលពីថ្ងៃទី ២០-២១ ខែឧសភា ឆ្នាំ២០២៤។

បើតាមសមត្ថកិច្ចបានបញ្ជាក់ថាហេតុការណ៍នៃគ្រោះធម្មជាតិនេះ គឺបានកើតឡើងលើពីរករណីផ្សេងគ្នា ដោយលើកទីមួយគឺនៅថ្ងៃទី ២០ ខែឧសភា ឆ្នាំ២០២៤ វេលាម៉ោងប្រហែល១៣និង៣០នាទី មានភ្លៀង១ មេធំនៅចំណុចភូមិថ្លុកសង្កែ ឃុំសិរីមានជ័យ ស្រុកសំពៅលូន ខេត្តបាត់ដំបង គឺមានភ្លៀងធ្លាក់១មេយ៉ាងធំ បណ្តាលឲ្យមាន ផ្គររន្ទះ បាញ់ទៅលើជនរងគ្រោះម្នាក់ ឈ្មោះ វ៉ែន ភារ៉ា ភេទ ប្រុសអាយុ ៤៣ឆ្នាំ មានទីលំនៅភូមិកើតហេតុខាងលើ បណ្តាលឲ្យស្លាប់ភ្លាមៗខណៈដែលជនរងគ្រោះដើរទៅមើលចម្ការនៅក្រោយផ្ទះ ពេលដែលមេឃកំពុងធ្លាក់ភ្លៀង ដែលបង្កឲ្យមានការភ្ញាក់ផ្អើលនិងធ្វើឲ្យកម្លាំងសមត្ថកិច្ចចុះទៅពិនិត្យសាកសពភ្លាមៗផងដែរ។

លុះនៅថ្ងៃទី២១ ខែឧសភា ឆ្នាំ២០២៤វេលាម៉ោង ១៣ និង ០០នាទី ស្ថិតនៅភូមិល្វាទេ ឃុំត្រាង ស្រុកកំរៀង ខេត្តបាត់ដំបង ក៏មានភ្លៀងធ្លាក់មួយមេធំ លាយឡំផ្គរន្ទះបានបណ្ដាលឲ្យរន្ទះបាញ់ចំសត្វគោងាប់អស់ចំនួន ១ក្បាល ដែលម្ចាស់គោ ឈ្មោះ សាំង សាន ភេទប្រុស អាយុ៤២ឆ្នាំ រស់នៅភូមិកើតហេតុខាងលើ មុខរបរ កសិករ ។ ម្ចាស់គោបានប្រាប់ថា មកពីគាត់ចងគោហាលវាលមិនបានដេញចូលក្រោលផ្ទះ ទើបត្រូវរន្ទះបាញ់ងាប់បែបនេះ ព្រោះគាត់មិននឹកស្មានថាការចងគោហាលវាលក្រោមដំណក់ទឹកភ្លៀងបែបនេះត្រូវរន្ទះបាញ់ងាប់ទាល់តែសោះ៕

អត្ថបទ៖ សោ និយមរ័ត្ន