ក្រសួងសុខាភិបាល និង PATH ផ្តួចផ្តើម ការអនុវត្តសកម្មភាពក្នុងគម្រោងសុខភាពតែមួយ

វេជ្ជបណ្ឌិត យក់ សម្បត្តិ រដ្ឋលេខាធិការ ក្រសួងសុខាភិបាល និងជាប្រធានគណៈកម្មការអន្តរក្រសួងសម្រាប់សម្របសម្រួលសុខភាពតែមួយ នៅថ្ងៃទី៧ ខែសីហា ឆ្នាំ២០២៤ នេះ បានទទួលជួប អ្នកស្រីវេជ្ជបណ្ឌិត Nguyen Tuyet Nga, ប្រធានការិយាល័យ PATH ប្រទេសវៀតណាម និងជានាយិកាមជ្ឈមណ្ឌលអាស៊ីអាគ្នេយ៍។ ជំនួបពិភាក្សានេះ ដោយសង្កត់ធ្ងន់លើកិច្ចសហការរវាងក្រសួងសុខាភិបាល និង PATH ក្នុងការជម្រុញគំនិតផ្តួចផ្តើម និងការអនុវត្តសកម្មភាពក្នុងគម្រោងសុខភាពតែមួយ (One Health) និងគម្រោងរួមផ្សេងទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វេជ្ជបណ្ឌិតរដ្ឋលេខាធិការ បានថ្លែងអំណរគុណ និងផ្តល់ការគាំទ្រចំពោះកិច្ចសហប្រតិបត្តិការរបស់ PATH នៅកម្ពុជា ព្រមទាំងស្នើសុំបន្តពង្រឹង និងពង្រីកកិច្ចសហប្រតិបត្តិការនេះឱ្យកាន់តែទូលំទូលាយបន្ថែមទៀត ដើម្បីរួមចំណែកជាមួយនឹងកិច្ចខិតខំប្រឹងប្រែងរបស់ក្រសួងសុខាភិបាលនៃព្រះរាជាណាចក្រកម្ពុជា។

វេជ្ជបណ្ឌិត Nguyen Tuyet Nga បានបង្ហាញអំពីទិដ្ឋភាពទូទៅ នៃការរួមចំណែករបស់ PATH រួមទាំងការបញ្ចប់ការសិក្សាលទ្ធភាពគម្រោងសុខភាពតែមួយ (Feasibility Study OH4C) ដោយជោគជ័យ និងការគាំទ្រជាបន្តសម្រាប់គម្រោងសុខភាពតែមួយ (One Health)។ អ្នកស្រីវេជ្ជបណ្ឌិតបានថ្លែងអំណរគុណចំពោះកិច្ចសហប្រតិបត្តិការរបស់ក្រសួងសុខាភិបាល និងសង្ឃឹមថា នឹងមានកិច្ចសហការ និងការគាំទ្របន្តទៀត។

គួរបញ្ជាក់ថា ជំនួបពិភាក្សានេះ មានគោលបំណង ផ្តោតទៅលើចំណុចសំខាន់ៗដូចជា ទី១ ការពិនិត្យមើលការងាររបស់ PATH និងការគាំទ្រសម្រាប់យុទ្ធសាស្រ្តគម្រោងសុខភាពតែមួយ (One Health) ទី២ ការពិភាក្សាលើផ្នែកសំខាន់ៗ នៃកិច្ចសហប្រតិបត្តិការ រួមទាំងការគាំទ្រមន្ទីរពិសោធន៍ និងការសម្របសម្រួលការឆ្លើយតបបន្ទាន់ និងទី៣ ការរៀបចំផែនការសម្រាប់ការចូលរួមនាពេលអនាគត និងយុទ្ធសាស្ត្រជាមួយ PATH ក្នុងការដំណើរការគម្រោង ក៏ដូចជាជាមួយដៃគូពាក់ព័ន្ធផ្សេងទៀត៕