ខ្យល់កន្ត្រាក់បោកបក់រលំដើមឈើសង្កត់ផ្ទះពលរដ្ឋ៥ខ្នង

លំនៅដ្ឋានប្រជាពលរដ្ឋចំនួន ៥ខ្នង ត្រូវបានខូចខាតខ្ទេចខ្ទីយ៉ាងដំណំបន្ទាប់ពីមានខ្យល់កន្ត្រាក់បានបោកបក់យ៉ាងខ្លាំង និងផ្ដួលដើមឈើចំនួន៣ដើម បណ្ដាលឱ្យដួលសង្កត់ទៅលើលំនៅដ្ឋានទាំងនោះតែម្ដង។

ហេតុការណ៍នៃគ្រោះធម្មជាតិនេះបានកើតឡើងកាលពីថ្ងៃទី២០ ខែសីហា ឆ្នាំ២០២៤ វេលាម៉ោង៤ល្ងាច នៅភូមិសំបួរមាស ឃុំស្នឹង ស្រុកបាណន់ ខេត្តបាត់ដំបង ដោយនៅមុនពេលកើតហេតុមានភ្លៀងធ្លាក់មួយមេយ៉ាងធំពេលនោះក៏មានខ្យល់កន្រ្តាក់បោកបក់មកតែម្ដងបណ្តាលឲ្យរលំដើមឈើ និងខូចខាតផ្ទះប្រជាពលរដ្ឋចំនួន ៥ខ្នង។

ម្ចាស់ផ្ទះដែលត្រូវបានខ្យល់បក់រលំរួមមាន ១.ម្ចាស់ឈ្មោះ សូ ម៉ៅ ភេទប្រុស អាយុ ៣៨ ឆ្នាំ  ផ្ទះទៀមសង់ពីឈើប្រក់ស័ង្កសី ទំហំ ៥x៤ ម។ ២.ម្ចាស់ឈ្មោះ សាត សើ ភេទប្រុស អាយុ៣៥ ឆ្នាំ ផ្ទះទៀមសង់ពីឈើប្រក់ស័ង្កសីទំហំ ៦x៥ ម ខូចខាតទាំងស្រុង ។ ៣.ម្ចាស់ឈ្មោះ ជា សាវឿន ភេទស្រី អាយុ៦៤ ឆ្នាំ ផ្ទះតម្កល់សង់ពីឈើប្រក់ស័ង្កសី ទំហំ៥x៤ម ខូចខាត ស្ទើរទាំងស្រុង ។ ៤.ម្ចាស់ឈ្មោះ សុទ្ធ សាវឿន ភេទស្រី អាយុ៤២ ឆ្នាំ  ផ្ទះទៀមសង់ពីឈើប្រក់ស័ង្កសីទំហំ ៨x៥ ម ខូចខាត ដោយអន្លើ។ ៥.ម្ចាស់ឈ្មោះ សិត អ៊ក ភេទ ស្រី អាយុ ៤៣ ឆ្នាំ ផ្ទះតម្កល់សង់ពីឈើប្រក់ស័ង្កសី ទំហំ ៥x៤ ម ដួលរលំទាំងស្រុង ។ នៅក្នុងករណីនេះដែរមិនបណ្តាលអោយរងគ្រោះដល់មនុស្សសត្វឡើយ៕

អត្ថបទ៖ សោ និយមរ័ត្ន