គុយបាជួបទុក្ខផ្ទួនៗ រងគ្រោះរញ្ជួយដីកម្រិត ៦,៨ រ៉ិចទ័រ បន្ទាប់ពីខ្យល់ព្យុះ និងដាច់ភ្លើង

ប្រទេសគុយបា​ដែលនៅ​ជិត​សហរដ្ឋអាមេរិក​​ជាងគេ បាន​ជួបទុក្ខផ្ទួនៗ ខណៈរញ្ជួយដីកម្រិត ៦,៨ រ៉ិចទ័របានអង្រួនភាគខាងកើតប្រទេសនេះ បន្ទាប់ពីខ្យល់ព្យុះសង្ឃរាជាច្រើនសប្តាហ៍វាយប្រហារនិងការដាច់ចរន្តអគ្គិសនី ដែលបានធ្វើឱ្យប្រជាជនប្រទេសនេះមានការលំបាកបន្ថែមទៀត។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី១១ខែវិច្ឆិកានេះ។

រញ្ជួយដីកាលពីថ្ងៃអាទិត្យនេះមាន ចំណុចកណ្តាលស្ថិតនៅចម្ងាយប្រហែល៤០គីឡូម៉ែត្រ ភាគខាងត្បូងនៃទីក្រុង Bartolome Maso ប្រទេសគុយបា។ នេះបើយោងតាមរបាយការណ៍មួយរបស់ U.S. Geological Survey។

ការរំញ័រមានឥទ្ធិពលទូទាំងភាគខាងកើតនៃប្រទេសគុយបា រួមទាំងទីក្រុងធំៗដូចជា Santiago de Cuba ក៏ដូចជា Holguin និង Guantanamo។ ទោះយ៉ាងណាមិនមានរបាយការណ៍ភ្លាមៗអំពីការខូចខាត ឬរបួសធ្ងន់ធ្ងរត្រូវបានរាយការណ៍នោះទែ។

គួរបញ្ជាក់ថា គ្រោះរញ្ជួយដីនេះកើតឡើងក្នុងអំឡុងពេលដ៏លំបាកមួយផ្សេងទៀតសម្រាប់ប្រទេសគុយបា។ កាលពីថ្ងៃពុធ ព្យុះសង្ឃរាប្រភេទទី ៣ Rafael បានបោកបក់កាត់ភាគខាងលិចប្រទេសគុយបា ជាមួយនឹងខ្យល់បក់បោកខ្លាំងពាសពេញ​ប្រទេស ដោយបានបំផ្លាញផ្ទះរាប់រយខ្នង និងបង្ខំឱ្យមនុស្សរាប់សែននាក់ជម្លៀសខ្លួនចេញ ខណៈប៉ុន្មានថ្ងៃក្រោយ​មកប្រទេសមានការដាច់ចរន្តអគ្គិសនីថែមទៀត។

ប៉ុន្មាន​សប្តាហ៍​មុន​ក្នុង​ខែ​តុលា កោះ​នេះ​ក៏​រង​ការ​វាយ​ប្រហារ​ចំនួន​ពីរដង។ ទីមួយ វាត្រូវបានវាយប្រហារដោយការដាច់ភ្លើងពេញប្រទេសដែលអូសបន្លាយជាច្រើនថ្ងៃ ដោយសារវិបត្តិថាមពលរបស់ប្រទេសនេះ។ មួយសន្ទុះក្រោយមក វាត្រូវបានបក់បោកដោយខ្យល់ព្យុះដ៏ខ្លាំងមួយ ដែលបានវាយប្រហារភាគខាងកើតនៃកោះនេះ ហើយបានសម្លាប់មនុស្សយ៉ាងតិចប្រាំមួយនាក់។ ការដាច់ចរន្តអគ្គិសនី និងការមិនសប្បាយចិត្តកាន់តែខ្លាំងក្នុងចំណោមអ្នកប្រឆាំងជាច្រើនបានបង្កឱ្យមានការតវ៉ាតូចៗនៅទូទាំងប្រទេស៕

អត្ថបទ៖ ប៊ុន សុភាព