ក្រសួងអប់រំ ប្រកាសរើសគ្រូបង្រៀនឱ្យចូលរួមកម្មវិធីប្រកួតប្រជែង គ្រូបង្រៀនដែលមានគំនិងច្នៃប្រឌិតផ្នែកបច្ចេកវិទ្យា

នៅរសៀលថ្ងៃទី១៤ ខែមករា ឆ្នាំ២០២៥ ផេកក្រសួងអប់រំ យុវជន និងកីឡា បានប្រកាសពីការជ្រើសរើសគ្រូបង្រៀនចូលរួមកម្មវិធីប្រកួតប្រជែង “គ្រូបង្រៀនដែលមានគំនិតច្នៃប្រឌិតខ្ពស់ផ្នែកបច្ចេកវិទ្យាអប់រំកម្ពុជា ឆ្នាំ២០២៥” ដែលបានឱកាសប្រកួតប្រជែងដល់គ្រូបង្រៀនទូទាំងប្រទេសដែលបាននិងកំពុងប្រើប្រាស់បច្ចេកវិទ្យាប្រកបដោយភាពច្នៃប្រឌិតខ្ពស់ជំនួយដល់ការបង្រៀន និងរៀន និងការបំពេញការងារ។

ចំពោះម្ចាស់ជ័យលាភីនឹងត្រូវជ្រើសរើសចំនួន៣នាក់ ដោយម្ចាស់ជ័យលាភីលេខ១ ទទួលបានប្រាក់ឧបត្ថម្ភចំនួន ៤លានរៀល, ជ័យលាភីលេខ២ ទទួលបានប្រាក់ឧបត្ថម្ភ ៣លានរៀល និងម្ចាស់ជ័យលាភីលេខ៣ ទទួលបានចំនួន ២លានរៀល។ ចំពោះ ម្ចាស់ជ័យលាភីទាំង៣រូប នឹងត្រូវបានអញ្ជើញឱ្យមកធ្វើបទបង្ហាញ និងប្រគល់ពានរង្វាន់នៅ សន្និសីទ និងពិព័រណ៍បច្ចេកវិទ្យាអប់រំ លើកទី១ នៅកម្ពុជា (The First Cambodia EdTech Summit) ដែលនឹងប្រព្រឹត្តទៅនៅថ្ងៃទី១៧ ដល់ ១៨ ខែកុម្ភៈ ឆ្នាំ២០២៥ នៅវិទ្យាស្ថានបច្ចេកវិទ្យាកម្ពុជាផងដែរ។

លក្ខខណ្ឌនៃការជ្រើសរើសមានដូចជា ជា​ជនជាតិ​ខ្មែរ និង​កំពុង​ស្នាក់​នៅ​ក្នុង​ប្រទេស​កម្ពុជា, ជា​គ្រូបង្រៀន ដែល​កំពុង​បង្រៀន​នៅ​តាម​គ្រឹះស្ថាន​សិក្សា​សាធារណៈ ឬ​ឯកជន, ជាគ្រូបង្រៀនដែលមាន​គំនិត​ច្នៃ​ប្រឌិត​ខ្ពស់​ក្នុង​ការ​ប្រើប្រាស់​បច្ចេកវិទ្យា​គាំទ្រ​ដល់​​ការ​បង្រៀននិងរៀន និង​ការ​សិក្សា​ស្រាវជ្រាវ, មាន​ការ​គាំទ្រ​ពី​គណៈ​គ្រប់គ្រង​សាលារៀន​ ឱ្យ​ចូល​រួម​កម្មវិធី​ប្រកួត​ប្រជែង​នេះ។

សម្រាប់គ្រូបង្រៀនដែលមានចំណាប់អារម្មណ៍ដាក់ពាក្យប្រកួតប្រជែងកម្មវិធីនេះ អាចដាក់ពាក្យបានតាមរយៈតំណភ្ជាប់៖ https://edtechcambodia.org/edtechteacher2025 ។ ចំពោះការដាក់ពាក្យចាប់ពីថ្ងៃជូនដំណឹងនេះ រហូតដល់ ថ្ងៃទី១០ ខែកុម្ភៈ ឆ្នាំ២០២៥ ត្រឹមម៉ោង ១៧:០០៕