ព័ត៌មានអន្ដរជាតិ

រដ្ឋបាលលោក បៃដិន ដាក់ទណ្ឌកម្មបន្ថែមទៀតលើរុស្ស៊ី មុនចាកចេញពីតំណែង

បានផុស

១ year មុន

នៅ

ថ្ងៃព្រហស្បតិ៍ ១៦ មករា ២០២៥

ដោយ

Chheang

សហរដ្ឋអាមេរិក បានប្រកាសដាក់ទណ្ឌកម្មបន្ថែមលើរុស្ស៊ី ដែលនេះជាទណ្ឌកម្មថ្មីបំផុត និងចុងក្រោយបំផុតមុនការបញ្ចប់អាណត្តិរបស់លោកប្រធានាធិបតី ចូ បៃដិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងការបរទេសអាមេរិក បានប្រកាសកាលពីថ្ងៃពុធទី១៥ខែមករាឆ្នាំ២០២៥ថា វិធានការនេះគឺសំដៅលើបុគ្គល និងអង្គភាពប្រហែល ២៥០ ដែលពាក់ព័ន្ធនឹងឧស្សាហកម្មការពារជាតិរុស្ស៊ី។

អ្នកនាំពាក្យក្រសួងការបរទេសលោក Matthew Miller បានបង្ហោះនៅលើបណ្ដាញសង្គម X ថា៖ «សហរដ្ឋអាមេរិកកំពុងដាក់ទណ្ឌកម្មលើបុគ្គល និងអង្គភាពជាង ២៥០ ដែលពាក់ព័ន្ធនឹងឧស្សាហកម្មការពារជាតិរបស់រុស្ស៊ី និងគាំទ្រដល់មូលដ្ឋានឧស្សាហកម្មយោធារបស់ខ្លួន។ យើងនឹងបន្តប្រើប្រាស់វិធីដែលមានទាំងអស់ ដើម្បីរារាំងកិច្ចខិតខំប្រឹងប្រែងសង្រ្គាមរបស់រុស្ស៊ី និងរំខានដល់ការប៉ុនប៉ងដើម្បីគេចចេញពីការដាក់ទណ្ឌកម្ម»។

ទណ្ឌកម្មនេះ នឹងហាមប្រាមពលរដ្ឋអាមេរិក និងប្រជាជននៅសហរដ្ឋអាមេរិកមិនឲ្យធ្វើអាជីវកម្មជាមួយក្រុមហ៊ុន និងប្រជាជនរុស្ស៊ីដែលរងទណ្ឌកម្ម។ ទណ្ឌកម្មនេះទៀតសោតក៏ធ្វើឲ្យអាជីវកម្មអន្តរជាតិកាន់តែលំបាកសម្រាប់រុស្ស៊ី។

សូមបញ្ជាក់ថា កាលពីចុងសប្តាហ៍មុន អាមេរិកបានប្រកាសដាក់ដាក់ទណ្ឌកម្មថ្មីមួយលើវិស័យថាមពលរុស្ស៊ី។ អាមេរិក និងសម្ព័ន្ធមិត្ត បានអនុវត្តការដាក់ទណ្ឌកម្មជាបន្តបន្ទាប់លើរុស្ស៊ី ចាប់តាំងពីការចាប់ផ្តើមនៃការលុកលុយពេញលេញលើអ៊ុយក្រែន ដើម្បីធ្វើឲ្យប្រាក់ចំណូល និងសមត្ថភាពយោធារបស់រុស្ស៊ីចុះខ្សោយ។ ក្នុងពេលជាមួយគ្នានេះ រដ្ឋបាលលោក បៃដិន កំពុងសម្រុកបញ្ជូនជំនួយយោធាយ៉ាងច្រើនទៅកាន់ទីក្រុងកៀវ មុនពេលប្រគល់អំណាចឲ្យទៅប្រធានាធិបតីទើបជាប់ឆ្នោតលោក ដូណាល់ ត្រាំ នាថ្ងៃទី២០ខែមករា ដើម្បីប្រើប្រាស់ថវិកាដែលបានអនុម័តរួចហើយដោយសភាអាមេរិក៕

ដោយ៖ ឈាង