ព័ត៌មានអន្ដរជាតិ

ស្លាប់៤នាក់ និងបាត់ខ្លួន៣នាក់ក្នុងហេតុការណ៍ក្រឡាប់ទូកដោយសារខ្យល់ខ្លាំងនិងរលកធំៗនៅឥណ្ឌូណេស៊ី

បានផុស

៥ ខែ មុន

នៅ

ថ្ងៃអង្គារ ១១ កុម្ភៈ ២០២៥

ដោយ

ទីភ្នាក់ងារ Xinhua បានចុះផ្សាយនៅថ្ងៃទី១១ខែកុម្ភៈនេះថា មនុស្ស៤នាក់បានស្លាប់ និង៣នាក់ផ្សេងទៀតកំពុងបាត់ខ្លួន បន្ទាប់ពីទូកល្បឿនលឿនមួយគ្រឿងដឹកអ្នកដំណើរ៥១នាក់ បានក្រឡាប់នៅក្នុងខេត្ត Kalimantan ភាគខាងជើងប្រទេសឥណ្ឌូណេស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Dede Hariana ប្រធានអង្គភាពជួយសង្គ្រោះ បានឱ្យដឹងថា ទូកល្បឿនលឿន Iksa Express ត្រូវបានវាយប្រហារដោយរលកធំៗ ហើយក៏ក្រឡាប់ ពេលកំពុងធ្វើដំណើរចេញពីខេត្ត Bulungan Regency កាលពីថ្ងៃចន្ទ។ ទូកនេះដឹកមនុស្សសរុប៥១នាក់ក្នុងនោះមនុស្ស៤នាក់បានស្លាប់និង៣នាក់នៅបាត់ខ្លួននៅឡើយ។

ក្រុមអ្នកជួយសង្គ្រោះបានជម្លៀសមនុស្សចំនួន៤៤នាក់ចេញដោយសុវត្តិភាព ខណៈដែលសាកសពអ្នកស្លាប់ទាំង៤នាក់ត្រូវបានបញ្ជូនទៅមន្ទីរពេទ្យទូទៅ Bulungan។ ប្រតិបត្តិការស្វែងរកអ្នកបាត់ខ្លួនទាំងបីនាក់នៅតែបន្តនៅថ្ងៃអង្គារនេះ ដោយមានការចូលរួមពីក្រុមជួយសង្គ្រោះដែលដឹកនាំដោយការិយាល័យស្វែងរក និងជួយសង្គ្រោះ។

ទីភ្នាក់ងារឧតុនិយម អាកាសធាតុ និងភូគព្ភសាស្ត្ររបស់ប្រទេសឥណ្ឌូណេស៊ី ក៏បានព្រមានអ្នកធ្វើដំណើរឱ្យប្រុងប្រយ័ត្នក្នុងអំឡុងពេលធ្វើដំណើរតាមសមុទ្រ ដោយសារអាកាសធាតុប្រែប្រួលខ្លាំងអាចបណ្តាលឱ្យមានរលកខ្ពស់ និងខ្យល់បក់ខ្លាំងផងដែរ៕