កម្ពុជា-វៀតណាមបញ្ជាក់ពីការធ្វើឱ្យព្រំដែនមានសន្ដិភាពនិងជំរុញការបោះព្រំដែនដែលនៅសល់ឱ្យឆាប់ចប់

ឧបនាយករដ្ឋមន្ត្រីការបរទេសលោក ប្រាក់ សុខុន និងឧបនាយរដ្ឋមន្ត្រីការបរទេសវៀតណាមលោក ប៊ូយ ថាញ់សឺន បានបញ្ជាក់ពីការប្ដេជ្ញាចិត្តសាជាថ្មីចំពោះការប្រែក្លាយតំបន់ព្រំដែនទៅជាតំបន់ពោពេញដោយសន្ដិភាព ព្រមទាំងប្ដេជ្ញាចិត្តក្នុងការបន្តពង្រឹងសាមគ្គីភាពនិងកិច្ចសហប្រតិបតិ្តការរវាងប្រទេសទាំងពីរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីនៃប្រទេសទាំងពីរបានលើកឡើងក្នុងជំនួបមួយក្នុងពេលដែលលោកឧបនាយករដ្ឋមន្ត្រី ប្រាក់ សុខុន អញ្ជើញចូលរួម​វេទិកាអនាគតអាស៊ានលើកទី២ នៅទីក្រុងហាណូយ ប្រទេសវៀតណាម កាលពីថ្ងៃទី២៥ ខែកុម្ភៈ ឆ្នាំ២០២៥។

ក្នុងសេចក្ដីប្រកាសព័ត៌មានពីលទ្ធផលនៃការចូលរួមប្រជុំនោះឱ្យដឹងថា៖ «ភាគីទាំងពីក៏បញ្ជាក់ពីការប្ដេជ្ញាចិត្តសាជាថ្មីចំពោះការប្រែក្លាយតំបន់ព្រំដែនទៅជាតំបន់ពោពេញដោយសន្ដិភាព ស្ថេរភាព កិច្ចសហប្រតិបត្តិការ និងអភិវឌ្ឍន៍ និងការអនុវត្តនូវអ្វីដែលជាឯកភាពដោយថ្នាក់ដឹកនាំរបស់ប្រទេសទាំងពីរ»។

ក្នុងសេចក្ដីប្រកាសព័ត៌មាននោះក៏បានឱ្យដឹងថាលោកឧបនាយករដ្ឋមន្ត្រី ក៏ជួបពិភាក្សាការងារជាមួយនាយករដ្ឋមន្ត្រីវៀតណាមលោក ផាម មីញជីញ ផងដែរតែពុំបានលំអិតច្រើននោះទេ ខណៈសារព័ត៌មានរដ្ឋវៀតណាម Vietnam News បានចុះផ្សាយថាលោក ផាម មីញជីញ បានស្នើឱ្យ កម្ពុជា-វៀតណាមធ្វើការជាមួយគ្នាស្វែងរកដំណោះស្រាយ​ដែលអាចទទួលយកបានបោះបង្គោលព្រំដែនដែលនៅសល់១៦%ឱ្យបានឆាប់ចប់ ដែលនឹងជួយឱ្យមានភាពកាន់តែងាយស្រួលដល់ការកសាងព្រំដែនសន្ដិភាព ស្ថេរភាព និងការអភិវឌ្ឍដោយចិរភាពនៃប្រទេសទាំងពីរ។

ប្រទេសវៀតណាម-កម្ពុជា មានព្រំដែនប្រវែង ១ ២៥៥គីឡូម៉ែត្រ និងបានបញ្ចប់ការបោះបង្គោលព្រំដែនប្រមាណ ១ ០៤៥ គ.មហើយ នៅសល់ប្រមាណ ១៦%ទៀតដែលត្រូវចរចារដោះស្រាយ។

ការបោះបង្គោលព្រំដែនជាមួយប្រទេសជិតខាង​ក្រៅពីវៀតណាម កម្ពុជាក៏បានសម្រេចកំណត់ព្រំដែនជាមួយប្រទេសឡាវបានប្រមាណ៨៦ភាគរយ ខណៈជាមួយប្រទេសថៃ ភាគីទាំងពីរទទួលស្គាល់បង្គោលចាស់ដែលបានរកឃើញហើយបានបង្កើតគណៈកម្មការចម្រុះដើម្បីបន្ដការងារនេះ៕

អត្ថបទដោយ ហ៊ុន សិរីវឌ្ឍន៍