ក្ដីបារម្ភពីពន្ធ ទម្លាក់តម្លៃប្រាក់ដុល្លារ បង្កើនប្រាក់យ៉េនជប៉ុន និងហ្រ្វង់ស្វីស

តម្លៃ​ប្រាក់ដុល្លារ បាន​ធ្លាក់ចុះ​ក្នុង​ការ​ជួញដូរ​នៅថ្ងៃចន្ទនេះ ដល់​កម្រិត​ទាប​បំផុត​ក្នុងរយៈពេល ៤ ខែ ធៀប​នឹង​ប្រាក់អន្តរជាតិសំខាន់ៗទៀត​ ខណៈ​ក្ដីបារម្ភភាព​តានតឹង​ពាណិជ្ជកម្ម​សកល​ក្រោម​វិធានការពន្ធគយ​ បាន​ធ្វើ​ឱ្យតម្លៃ​ប្រាក់យ៉េនរបស់​ជប៉ុន និង​ហ្រ្វង់របស់​ស្វីស​ កើន​ឡើង​។ នេះបើតាម​ការ​ចុះផ្សាយ​របស់​ទីភ្នាក់ងារសារព័ត៌មាន​រ៉យទ័រ​។ ​

សន្ទស្សន៍តម្លៃប្រាក់ដុល្លារ ដែលបង្ហាញពីតម្លៃ​ប្រាក់ដុល្លារ​អាមេរិកធៀបនឹងរូបិយប័ណ្ណ​សំខាន់​ៗ ៦ ផ្សេងទៀត ស្ថិតនៅ ១០៣,៨៣ ពិន្ទុ សម្រាប់ការជួញដូរ​នៅថ្ងៃចន្ទនេះ ​ដោយ​នៅជិតកម្រិតទាបបំផុត​ក្នុង​រយៈពេល ៤ ខែ ដែលវាបានឈានដល់កាលពីសប្តាហ៍មុន។

តម្លៃ​ប្រាក់ដុល្លារ បានធ្លាក់ចុះច្រើនជាង ៣ ភាគរយ​ កាលពីសប្តាហ៍មុន ធៀបនឹងរូបិយប័ណ្ណ​ជាគូ​​ប្រជែង​ធំៗ ដែល​ធ្វើ​ឱ្យ​​វា​ក្លាយជា​សប្ដាហ៍​ខ្សោយ​បំផុត​សម្រាប់ប្រាក់ដុល្លារ រាប់តាំងពីខែវិច្ឆិកា ឆ្នាំ ២០២២ ចំពេល​វិនិយោគិន​ព្រួយបារម្ភពីបញ្ហាពន្ធគយ និង​ផលប៉ះពាល់លើ​សេដ្ឋកិច្ច។ ​

ក្នុងស្ថានភាព​បែប​នេះ វិនិយោគិន​ដែល​ជៀសវាង​ហានិភ័យ បាន​ងាកទៅរក​ការវិនិយោគប្រាក់យេន​របស់​ជប៉ុន និងហ្វ្រង់របស់ស្វីសវិញ ដែល​ធ្វើឱ្យតម្លៃរូបិយប័ណ្ណ​កើន​ឡើងដល់អត្រាខ្ពស់បំផុតក្នុងរយៈពេលជាច្រើន​ខែ។

​សម្រាប់ការជួញដូរនៅថ្ងៃចន្ទនេះ​ តម្លៃប្រាក់យ៉េន​បានកើន​ឡើង ០,២៥ ភាគរយ ដោយ​ជួញដូរ​នៅ ១៤៧,៦៨ យ៉េន/ដុល្លារ ពោលគឺទាបជាងតម្លៃខ្ពស់បំផុតក្នុងរយៈពេល​ ៥ ខែ ប្រមាណ ១៤៦,៩៤ យ៉េន/ដុល្លារ ក្នុងការជួញដូរ​កាលពីថ្ងៃសុក្រ។

ចំណែកឯ​​តម្លៃប្រាក់ហ្វ្រង់​ស្វីសវិញ ​បាន​ឡើង​ដល់​តម្លៃ​ខ្ពស់​បំផុត​ក្នុង​រយៈ​ពេល​ ៣ ​ខែ​ ពោលគឺ ០,៨៧៦៦៥ ហ្វ្រង់/ដុល្លារ។ ​តម្លៃប្រាក់អឺរ៉ូ​នៅថេរ ត្រឹមប្រមាណ ១ អឺរ៉ូ/ ១,០៨៤២ ដុល្លារ ​​ក្រោយ​​កើន​ឡើង​ប្រចាំសប្ដាហ៍ល្អបំផុត​​រាប់ចាប់តាំងពីឆ្នាំ ២០០៩ កាលពីសប្ដាហ៍មុន ដោយសារតែកំណែទម្រង់សារពើពន្ធសំខាន់ៗនៅអាល្លឺម៉ង់។ ​

គួរគូស​បញ្ជាក់ថា ការប្រែប្រួលនេះ កើតឡើងខណៈ​ទីផ្សារអន្តរជាតិ​បានផ្តោតលើភាពតានតឹងពាណិជ្ជកម្ម នៅពេល​ប្រធានាធិបតីអាមេរិក លោក​ ដូណាល់ ត្រាំ ​បានដាក់ពន្ធលើដៃគូពាណិជ្ជកម្មសំខាន់ៗ ប៉ុន្តែបានពន្យារ​វិញ​មួយខែទៀត​លើម៉ិកស៊ិក និងកាណាដា​ ដោយសារ​មាន​សញ្ញា និងក្តីបារម្ភ​ពី​ការធ្លាក់ចុះ​នៃ​សេដ្ឋកិច្ចរបស់សហរដ្ឋអាមេរិក ដែលបង្កក្ដីបារម្ភសម្រាប់វិនិយោគិន៕