ទ័ពអាកាស សិង្ហបុរី ថៃ និងអាមេរិក ធ្វើសមយុទ្ធរួមគ្នាដើម្បីបង្កើនការត្រៀមខ្លួន

កងទ័ពអាកាសនៃសាធារណរដ្ឋសិង្ហបុរី ( RSAF)​ បានចូលរួមជាមួយប្រទេសថៃ និងសហរដ្ឋអាមេរិក ក្នុង​លំហាត់​សមយុទ្ធដែនអាកាសទ្រង់ទ្រាយធំ ដើម្បីបង្កើនការត្រៀមខ្លួន​ក្នុងការ​ប្រយុទ្ធជាក់ស្តែង​​ និង​បង្កើន​សមត្ថភាពប្រតិបត្តិការ។ នេះបើយោងតាមការចេញផ្សាយរបស់សារព័ត៌មាន​ The Nation នៅថ្ងៃទី២០ខែមីនានេះ។

RSAF បាននិយាយនៅថ្ងៃទី១៨ខែមីនាថា ខ្លួនមានយន្តហោះ២៦គ្រឿង ប្រព័ន្ធការពារដែនអាកាស១០គ្រឿង និងកងទ័ពជាង៧០០នាក់ដែលចូលរួមក្នុងសមយុទ្ធ Cope Tiger លើកទី៣១។

ដំណាក់កាលទីមួយនៃសមយុទ្ធត្រីភាគី ដែលជាលំហាត់បញ្ជាការត្រូវបានធ្វើឡើងពីថ្ងៃទី១៧ ដល់ថ្ងៃទី១៩ខែធ្នូ ឆ្នាំ ២០២៤ នៅមជ្ឈមណ្ឌលប្រតិបត្តិការ និងសមយុទ្ធពហុជាតិ នៅមូលដ្ឋានទ័ពជើងទឹក Changi សិង្ហបុរី។ ដំណាក់​កាល​ទី​២ ដែល​ជា​លំហាត់​ហ្វឹកហ្វឺន​ហោះ​ហើរ​នៅ​មូលដ្ឋាន​អាកាស​ Korat និង​ទីលាន Chandy ក្នុង​ប្រទេស​ថៃ បាន​ចាប់​ផ្តើម​នៅ​ថ្ងៃ​ទី១៧ខែ​មីនា ហើយ​នឹង​បញ្ចប់​នៅ​ថ្ងៃ​ទី ២៨ខែ​មីនា។

សមយុទ្ធនេះត្រូវ​បាន​សហ​ការ​ដោយ​ប្រធាន​កង​ទ័ព​អាកាស​របស់​សិង្ហបុរី ឧត្តម​សេនីយ៍ Kelvin Fan, អគ្គមេបញ្ជាការ​​កង​ទ័ព​អាកាស​ថៃលោក Punpakdee Pattanakul, និងមេបញ្ជាការទ័ពអាកាសទីប្រាំ នៃកងទ័ពអាកាសប៉ាស៊ីហ្វិក ឧត្តមសេនីយ៍ឯក Stephen F. Jost ។

គួរបញ្ជាក់ថាសមយុទ្ធ Cope Tiger បានចាប់ផ្ដើមតាំងពីឆ្នាំ ១៩៩៤ កំពុងបង្កើនជំនាញវិជ្ជាជីវៈ និងទំនាក់ទំនងការពារជាតិរវាងសិង្ហបុរី ថៃ និងសហរដ្ឋអាមេរិក ក៏ដូចជាការលើកកម្ពស់ទំនាក់ទំនងកាន់តែជិតស្និទ្ធ និងការយោគយល់គ្នាទៅវិញទៅមកក្នុងចំណោមកងទ័ពរបស់ប្រទេសទាំងបី៕

អត្ថបទ៖ ប៊ុន សុភាព