​​បំពាក់ភ្លើង​សូឡា​​​តាម​ផ្លូវ​ជាតិលេខ ៦ ពី​​ព្រំប្រទល់​ខេត្តកំពង់ចាមដល់​ខេត្តសៀមរាប សម្រួល​ធ្វើ​ដំណើរ​ពេលយប់ដល់​ពលរដ្ឋ​

រដ្ឋបាលខេត្តកំពង់ធំ​នឹង​ចាប់ផ្តើមអនុវត្តជាជំហានៗនូវ​ «យុទ្ធនាការបំពាក់បង្គោលភ្លើងសូឡានៅតាមផ្លូវជាតិ​លេខ ៦» នៅក្នុងភូមិសាស្ត្រខេត្តកំពង់ធំ ចាប់​ពីព្រំប្រទល់ខេត្តកំពង់ចាម រហូតដល់ព្រំប្រទល់ខេត្តសៀមរាបឱ្យបានរួចរាល់ទាំង​ស្រុង​នៅត្រឹមដំណាច់ឆ្នាំ ២០២៦។

ជាមួយការប្រមូលកៀរគរកម្លាំងសរុប និងមធ្យោបាយសរុបពីគ្រប់មជ្ឈដ្ឋាន រដ្ឋបាល​ខេត្តកំពង់ធំ​បាន​អះអាង​ថា គម្រោងដ៏ធំមានសារៈសំខាន់នេះ គឺ​សម្រាប់សម្រួល​ការធ្វើដំណើររបស់ប្រជាពលរដ្ឋនៅពេលមេឃងងឹត និងចំពោះពលរដ្ឋដែលរស់​នៅតាមដងផ្លូវជាតិលេខ ៦ ព្រមទាំងដើម្បីពង្រឹងការងារសន្តិសុខផងដែរ។

លោក នួន ផារ័ត្ន អភិបាល​ខេត្តកំពង់ធំ​បាន​គូស​បញ្ជាក់ថា រដ្ឋបាលខេត្តកំពង់ធំនឹង​ចាប់ផ្តើមបើក «យុទ្ធនាការបំពាក់បង្គោលភ្លើងសូឡានៅតាមដងផ្លូវជាតិលេខ ៦» នៅក្នុងភូមិសាស្ត្រខេត្តកំពង់ធំ ដោយ​អនុវត្ត​ជាជំហានៗ ជាមួយការប្រមូលកៀរគរកម្លាំងសរុប និងមធ្យោបាយសរុបពីគ្រប់មជ្ឈដ្ឋាន។

លោកបន្ត​ថា យុទ្ធនាការបំពាក់បង្គោលភ្លើងសូឡានៅតាមផ្លូវជាតិលេខ ៦ គឺ​អនុវត្ត​ចាប់ពី​ព្រំប្រទល់ខេត្តកំពង់ចាម រហូតដល់ព្រំប្រទល់ខេត្តសៀមរាបប្រវែងសរុប ១៤៤ គីឡូម៉ែត្រ ហើយ​តាម​ផែនការ​​ត្រូវ​សម្រេច​ឱ្យ​បញ្ចប់​ទាំងស្រុងនៅត្រឹមដំណាច់​ឆ្នាំ២០២៦៕