ព័ត៌មានអន្ដរជាតិ

ត្រីមាសដំបូង តំបន់ទេសចរណ៍ហ្លួងព្រះបាងរបស់ឡាវ មានកំណើនទេសចរជាង៧២២% ទទួលចំណូលជាង ៥៨៤លានដុល្លារ

បានផុស

១ year មុន

នៅ

ថ្ងៃពុធ ២៣ មេសា ២០២៥

ដោយ

ភ្ញៀវទេសចរជាតិនិងអន្តរជាតិនៅប្រទេសឡាវ បាននាំគ្នាសម្រុកទៅទស្សនានៅតំបន់រមណីយដ្ឋានបេតិកភណ្ឌពិភពលោក របស់អង្គការយូណេស្កូ ហ្លួងព្រះបាង ដោយមានកំណើនរហូតដល់៧២២,៦៧៩% ក្នុងត្រីមាសដំបូងនៃឆ្នាំនេះធៀបនឹងរយៈពេលដូចគ្នានៃឆ្នាំមុន ដោយសារតែភាពងាយស្រួលទៅទស្សនា បន្ទាប់ពីមានផ្លូវរថភ្លើងល្បឿនលឿនតភ្ជាប់ពីប្រទេសចិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មានក្នុងស្រុកឡាវ បានរាយការណ៍ដោយដកស្រង់សម្តីរបស់លោកស្រី Suddaphone Khomthavong ប្រធានមន្ទីរព័ត៌មាន វប្បធម៌ និងទេសចរណ៍ខេត្តហ្លួងព្រះបាង (Luang Prabang) ដែលបាននិយាយថា ក្នុងរយៈពេល៣ខែដើមឆ្នាំ២០២៥នេះ ភ្ញៀវទេសចរបានមកកម្សាន្តនៅទីក្រុងទេសចរណ៍បេតិកភណ្ឌពិភពលោករបស់អង្គការយូណេស្កូ «ខេត្តហ្លួងព្រះបាង (Luang Prabang)» សរុបចំនួន ១,១៦៧,៥៨១នាក់ បើធៀបនឹងរយៈពេលដូចគ្នាកាលពីឆ្នាំមុន កើនឡើងចំនួន៧២២,៦៧៩%។

ក្នុងចំណោមភ្ញៀវទេសចរទាំងអស់ ភ្ញៀវក្នុងស្រុកមានចំនួន ៤៥៩,០៩១នាក់ កើនឡើងចំនួន ២៩៧,០៨១នាក់ ស្មើនឹង១៨៣% បើធៀបនឹងរយៈពេលដូចគ្នាកាលពីឆ្នាំមុន និងភ្ញៀវទេសចរអន្តរជាតិ មានចំនួន ៧០៨,៤៩០នាក់ កើនឡើងចំនួន ៤២៥,៦៦១នាក់ ស្មើនឹង២៣២% បើធៀបនឹងរយៈពេលដូចគ្នាកាលពីឆ្នាំមុន ដែលធ្វើឱ្យឡាវទទួលបានប្រាក់ចំណូលសរុបពីភ្ញៀវទេសចររហូតដល់ ៥៨៤,៦៦៥,៣៦៩ដុល្លារ។

លោកស្រី Suddaphone បានបន្តថា សម្រាប់ឆ្នាំ២០២៤កន្លងទៅ ក្រុងហ្លួងព្រះបាង (Luang Prabang) ទទួលបានភ្ញៀវទេសចរសរុបចំនួន ២,៣២៦,៧៥៨នាក់ ពោលគឺលើសពីគោលដៅ៣០,៨%នៃផែនការប្រចាំឆ្នាំ និងទទួលបានប្រាក់ចំណូលពីភ្ញៀវទេសចរចំនួន ១,២០៩,១៨៩,៥៤៩ដុល្លារ។

សារព័ត៌មានឡាវ Lao National Radio បានរាយការណ៍ថា ការកើនឡើងនៃចំនួនភ្ញៀវទេសចរមកកាន់ទីក្រុង បេតិកភណ្ឌពិភពលោកខេត្តហ្លួងព្រះបាងនេះ ដោយសារឡាវមានផ្លូវរថភ្លើងល្បឿនលឿន (ឡាវ-ចិន) ពីទីក្រុងវៀងចន្ទន៍-ក្រុងហ្លួងព្រះបាង-តំបន់សេដ្ឋកិច្ចពិសេសបរតែន (Borten) ជាប់ព្រំដែនជាមួយប្រទេសចិន ដែលធ្វើឱ្យភ្ញៀវទេសចរចំណាយពេលតិចក្នុងការធ្វើដំណើរត្រឹមតែរយៈពេលប្រហែល២ម៉ោងប៉ុណ្ណោះ បើធៀបពីមុនត្រូវចំណាយពេលរហូតដល់ជាង៨ម៉ោងឯណោះទើបដល់ ពោលគឺងាយស្រួលក្នុងការធ្វើដំណើរនិងកាត់បន្ថយការចំណាយ៕

ភ្នាក់ងារ