វៀតណាមគ្រោងចរចាពន្ធជុំ​ទី៣ ជាមួយអាមេរិក នៅសប្ដាហ៍ក្រោយ

ក្រសួងពាណិជ្ជកម្មវៀតណាម បាន​ឱ្យដឹងនៅថ្ងៃព្រហស្បតិ៍​នេះ​ថា សហរដ្ឋអាមេរិក និងវៀតណាម នឹងរៀបចំកិច្ចចរចាពាណិជ្ជកម្មថ្មី​ទី៣ នៅចុងសប្តាហ៍ក្រោយ បន្ទាប់ពីរដ្ឋាភិបាលក្រុងហាណូយបានបញ្ជូនឯកសារឆ្លើយតបទៅនឹងសំណើពាណិជ្ជកម្មរបស់​រដ្ឋបាលប្រធានាធិបតី ដូណាល់ ត្រាំ។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

ក្រសួងមិនបាន​​និយាយពីថ្ងៃ ឬទីកន្លែងជាក់លាក់សម្រាប់ការចរចានៅឡើយទេ ​ខណៈពេលផុតកំណត់នៃការពន្យារពេលពន្ធគយបដិការ ៩០ ថ្ងៃ ​ខិត​កាន់តែជិតដល់ ដោយវៀតណាមប្រឈមនឹងអត្រាពន្ធខ្ពស់ ៤៦ ភាគរយ ប្រសិនបើការចរចាមិនបាន​សម្រេច។

សេចក្តីថ្លែងការណ៍នេះ ​ចេញផ្សាយឡើង​ក្រោយ​រដ្ឋមន្ត្រីពាណិជ្ជកម្មវៀតណាម លោក Nguyen Hong Dien និងតំណាងសភាពាណិជ្ជកម្មអាមេរិក លោក​ Jamieson Greer បានជួបប្រជុំគ្នានៅទីក្រុងប៉ារីសកាលពីថ្ងៃពុធ​។ ​

វាក៏ចេញផ្សាយផងដែរ ក្រោយ​សហរដ្ឋអាមេរិក​បាន​បញ្ជូនសំណើដ៏ «វែងអន្លាយ និងតឹងតែង» ទៅវៀតណាម​ រួមទាំងសំណើសុំឱ្យវៀតណាមកាត់បន្ថយការពឹងផ្អែកលើវត្ថុធាតុដើម និងសមាសធាតុពីចិន សម្រាប់ផលិតកម្មក្នុងស្រុករបស់ខ្លួន។ ​មន្រ្តីវៀតណាមនិយាយថា រដ្ឋាភិបាល​បាន​ផ្ញើឯកសារឆ្លើយតបទៅវិញហើយ ប៉ុន្តែមិនបានបញ្ជាក់ថាមានអ្វីខ្លះនោះទេ។

គួរគូស​បញ្ជាក់ថា វៀតណាមដែលមានអតិរេកពាណិជ្ជកម្មប្រមាណ ១២៣,៥ ប៊ីលាន​ដុល្លារ ជាមួយសហរដ្ឋអាមេរិក​កាលពីឆ្នាំមុន ពឹងផ្អែកខ្លាំងលើទីផ្សារ​អាមេរិក សម្រាប់ការនាំចេញរបស់ខ្លួន។ កន្លងមក ដើម្បីជាផ្នែកមួយ​នៃការចរចាពន្ធជាមួយ​រដ្ឋបាល ត្រាំ វៀតណាម​បាន​បង្រ្កាបលើទំនិញដែលយកវៀតណាមធ្វើជាផ្លូវនាំចេញទៅអាមេរិក ប្ដេជ្ញាបង្កើនការនាំចូលពីអាមេរិក និងការបន្ថយរបាំងពាណិជ្ជកម្មសម្រាប់ទំនិញអាមេរិកជាដើម៕