ទីបំផុត Pogba រកបានក្លិបថ្មី ក្រោយព្រមព្រៀងលក្ខខណ្ឌផ្ទាល់មាត់ជាមួយក្លិបគីឡូ UCL មួយ

ខ្សែបម្រើសញ្ជាតិ បារាំង Paul Pogba កាន់តែខិតជិតក្នុងការផ្លាស់ទៅចូលរួមក្លិប AS Monaco នៃលីគកំពូល បារាំង នៅរដូវក្តៅនេះ។

Pogba បច្ចុប្បន្នបានក្លាយជាកីឡាករផ្ទេរ ដោយគ្មានតម្លៃខ្លួន បន្ទាប់ពីរូបគេគ្មានក្លិបលេងអស់រយៈពេលកន្លះរដូវកាល ក្រោយត្រូវបានក្លិប Juventus ផ្តាច់កិច្ចសន្យាចោលកាលពីថ្ងៃទី ១ ខែ ធ្នូ ឆ្នាំ ២០២៤ ដោយសារជាប់ពាក់ព័ន្ធនឹងការប្រើប្រាស់សារធាតុហាមឃាត់។

យ៉ាងណា នៅរដូវកាលកាលថ្មីនេះ Pogba ទំនងជានឹងទទួលបានឱកាសបង្ហាញខ្លួននៅលើទីលានឡើងវិញឆាប់ៗ បន្ទាប់ពីសារព័ត៌មាន ESPN បានចុះផ្សាយថា អតីតខ្សែបម្រើក្រុម Manchester United និង Juventus នឹងចុះកិច្ចសន្យាជាមួយក្លិប Monaco នៅរដូវក្តៅនេះ។ ប្រភពដដែលបានបន្ថែមថា Pogba បានយល់ព្រមលក្ខខណ្ឌផ្ទាល់មាត់ជាមួយ Monaco ក្នុងកិច្ចសន្យារយៈពេល ២ រដូវកាល។

គួរឱ្យដឹងថា Pogba ដើមឡើយត្រូវបានគេដាក់ពិន័យមិនឱ្យពាក់ព័ន្ធនឹងបាល់ទាត់រយៈពេល ៤ ឆ្នាំ ដោយសារពិនិត្យឃើញវិជ្ជមានប្រើប្រាស់សារធាតុហាមឃាត់ ប៉ុន្តែចុងក្រោយ ត្រូវបានគេបានបន្ថយមកត្រឹមតែរយៈពេល ១៨ ខែ វិញ។ ដូច្នេះនៅរដូវកាលថ្មីនេះ ខ្សែបម្រើសញ្ជាតិ បារាំង វ័យ ៣២ ឆ្នាំនឹងអាចចូលប្រកបអាជីពជាកីឡាករបាល់ទាត់បានធម្មតាវិញ៕

ប្រែសម្រួល៖ សេម កុសល
ប្រភព៖ ESPN