សម្តេចតេជោ បញ្ជាក់ជាថ្មី ចង់បានតែពីរចំណុចប៉ុណ្ណោះពីភាគីថៃ គឺព្រំដែនសន្តិភាព​ និងសមរភូមិអភិវឌ្ឍ

សម្តេចតេជោ ហ៊ុន សែន ប្រធានព្រឹទ្ធសភា បានអះអាងជាថ្មីថា ក្នុងនាមជាប្រទេសជិតខាង សម្តេចចង់បានតែពីរចំណុចប៉ុណ្ណោះពីភាគីថៃ គឺព្រំដែនសន្តិភាព​ និងប្រែក្លាយពីសមរភូមិឱ្យទៅជាតំបន់អភិវឌ្ឍ ដើម្បីផលប្រយោជន៍ជូនប្រទេស និងប្រជាជនទាំងពីរ។

អញ្ជើញជួបសំណេះសំណាលជាមួយសមាជិកក្រុមប្រឹក្សាឃុំ-សង្កាត់ ស្រុក-ក្រុង ខេត្តព្រះវិហារ នៅសាលាខេត្តព្រះវិហារ នៅព្រឹកថ្ងៃទី ២៧ ខែមិថុនា សម្តេចតេជោ បានថ្លែងជាសាធារណៈដោយបញ្ជាក់ជាថ្មីថា កម្ពុជានៅតែចង់បានមិត្តភាពមួយជាមួយប្រទេសថៃ។ សម្តេចអះអាងថា៖« ខ្ញុំនៅតែចង់សម្រេចគោលដៅរបស់ខ្ញុំទាំងពីរចំណុច ទី១ ប្រែក្លាយតំបន់អតីតសមរភូមិឱ្យទៅជាតំបន់អភិវឌ្ឍ ទី២ ប្រែក្លាយព្រំដែនជាមួយប្រទេសជិតខាង​ទាំងអស់ឱ្យទៅជាព្រំដែនមិត្តភាព សន្តិភាព ទៅជាកិច្ចសហប្រតិបត្តិការ និងការអភិវឌ្ឍ»។

សម្តេចតេជោ បានអះអាងទៀតថា កម្ពុជាត្រៀមខ្លួនជាស្រេចដើម្បីធ្វើទំនាក់ទំនងជាមួយថៃ ព្រោះកម្ពុជាចង់មានដំ​ណោះស្រាយដោយសន្តិវិធី មិនថាតាមយន្តទ្វេភាគីក្តី ឬតាមយន្តការតុលាការអន្តរជាតិក្តី ហើយសម្តេចក៏មិនចាត់ទុកថៃជាសត្រូវនោះទេ។ សម្តេចថ្លែងថា៖«​ តែអ្នកណាដែលចាត់ទុកយើងជាសត្រូវ វាក៏ជាសត្រូវរបស់យើងដែរ។ ប្រជាជនថៃភាគច្រើន គឺមិនចាត់ទុកយើងជាសត្រូវទេ ឯប្រជាជនកម្ពុជា ក៏មិនចាត់ទុកថៃជាសត្រូវដែរ»។

បន្ថែមពីនេះ សម្តេចតេជោ ព្រលយដោយសង្ឃឹមថា នឹងមាននាយករដ្ឋមន្រ្តីថ្មីមួយនៅប្រទេសថៃ ដើម្បីដោះស្រាយបញ្ហាជាមួយប្រទេសជិតខាង ទាំងកម្ពុជា មីយ៉ាន់ម៉ា ម៉ាឡេស៊ី និងឡាវ ជាពិសេសជាមួយកម្ពុជា។ សម្តេចបញ្ជាក់ថា៖« ខ្ញុំមិនគិតថា យើងនៅតែប្រឈមមុខគ្នារាប់រយឆ្នាំ រាប់ទសវត្សនោះទេ វានឹងដល់ដំណាក់កាលណាមួយធូរស្រាល»។​

គួរជម្រាបថា ក្នុងជម្លោះព្រំដែននេះ នាយករដ្ឋមន្រ្តីកម្ពុជា សម្តេចធិបតី ហ៊ុន ម៉ាណែត បានបញ្ជាក់ថា លុះត្រាតែភាគីថៃបើកច្រកព្រំដែនដែលធ្លាប់បិទជាឯកតោភាគីឱ្យមានភាពប្រក្រតីឡើងវិញ នោះកម្ពុជានឹងប្រើពេល ៥ ម៉ោងយ៉ាងយូរ ដើម្បីសម្រួលឱ្យមានការបើកច្រកព្រំដែនធម្មតាឡើងវិញតាមក្រោយ៕