សន្តិសុខសង្គម

បុរសម្នាក់ ត្រូវរន្ទះបាញ់ស្លាប់ ខណៈកំពុងសម្រាកក្រោមផ្ទះ នៅខេត្តរតនគិរី

បានផុស

១ year មុន

នៅ

ថ្ងៃពុធ ២ កក្កដា ២០២៥

ដោយ

បុរសជនជាតិភាគតិចគ្រឹងម្នាក់ ត្រូវបានរន្ទះបាញ់ស្លាប់ភ្លាមៗ នៅពេលមេឃរកកល់ចង់ភ្លៀង និងមានផ្គរលាន់ ខណៈជនរងគ្រោះឈប់សម្រាកពីការងារជាជាងធ្វើផ្ទះថ្មី ដោយអង្គុយលើអង្រឹងក្រោមផ្ទះ ស្ថិតនៅភូមិបាក់កែ ឃុំវើនសៃ ស្រុកវើនសៃ ខេត្តរតនគិរី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរបាយការណ៍ប៉ូលិសប៉ុស្តិ៍នគរបាលឃុំវើនសៃ បានឲ្យដឹងថា កាលពីវេលាម៉ោង ១៣ និង ៣០ នាទីរសៀល ថ្ងៃទី ១ ខែកក្កដា ឆ្នាំ ២០២៥ មានគ្រោះធម្មជាតិរន្ទះបាញ់បាញ់ចំបុរសម្នាក់ បណ្ដាលឲ្យស្លាប់ភ្លាមៗ នៅនឹងកន្លែង។ ជនរងគ្រោះមានឈ្មោះ ខាំវ៉ាន់ ប៊ូរ៉ា ភេទប្រុស អាយុ ៣៨ ឆ្នាំ ជាជនជាតិគ្រឹង មុខរបរជាងធ្វើផ្ទះ។

សាក្សីនៅកន្លែងកើតហេតុ បានឲ្យដឹងថា ដំបូងឮសូរផ្គរលាន់ខ្លាំង ដោយមានផ្សែងនៅត្រង់អង្រឹងដែលជនរងគ្រោះបានអង្គុយ។ បន្ទាប់មក ក៏ឃើញជនរងគ្រោះដួល ទើបពួកគាត់នាំគ្នាស្ទុះទៅជួយលើកឡើង អង្រួនធ្វើចលនាដង្ហើម ស្រែកហៅ តែជាអកុសលបុរសរងគ្រោះបានផុតដង្ហើមទៅហើយ។ សាកសពជនរងគ្រោះ ត្រូវបានក្រុមគ្រួសារ ដឹកយកមកទៅភូមិ តាមម៉ូតូមកដល់ផ្ទះវិញ កាលពីវេលាម៉ោង ១០ និង ០៨ នាទីយប់ ថ្ងៃដដែល។

ដោយឡែក ប្រពន្ធជនរងគ្រោះ បានបញ្ជាក់ថា ប្តីរបស់គាត់បានចាកចេញពីផ្ទះកាលពីល្ងាចថ្ងៃសៅរ៍ ដើម្បីយកអង្ករទៅស្នាក់នៅធ្វើផ្ទះឲ្យគេបង្ហើយ ក៏ជួបហេតុការណ៍ដ៏អាក្រក់នេះតែម្ដង។

បច្ចុប្បន្ន សពជនរងគ្រោះ ត្រូវបានដឹកបញ្ជូនទៅផ្ទះគ្រួសារសព នៅភូមិទៀមលើ ឃុំកាចូន ស្រុកវើនសៃ ខេត្តរតនគិរី ដើម្បីចាត់ចែងធ្វើបុណ្យតាមប្រពៃណី៕

អត្ថបទ ៖ ចាប