សុខភាព

អ្នកផ្ទុកមេរោគអេដស៍ជាង ៥ ម៉ឺននាក់ ទទួលបានបណ្ណមូលនិធិសមធម៌ពីរាជរដ្ឋាភិបាល

បានផុស

១ សប្តាហ៍ មុន

នៅ

ថ្ងៃពុធ ៩ កក្កដា ២០២៥

ដោយ

មន្ត្រីជាន់ខ្ពស់ នៃមជ្ឈមណ្ឌលជាតិប្រយុទ្ធនឹងជំងឺអេដស៍សើស្បែក និងកាមរោគ បានឱ្យដឹងថា មានអ្នករស់នៅជាមួយមេរោគអេដស៍ប្រមាណជាង ៥ ម៉ឺននាក់ហើយ ទទួលបានបណ្ណមូលនិធិសមធម៌ពីរាជរដ្ឋាភិបាល ស្មើនឹងជាង ៧០% នៃចំនួនអ្នកជំងឺដែលបានមកទទួលសេវាព្យាបាលប្រមាណជាង ៧ ម៉ឺននាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិត អ៊ុក វិជ្ជា ប្រធានមជ្ឈមណ្ឌលជាតិប្រយុទ្ធនឹងជំងឺអេដស៍សើស្បែក និងកាមរោគ នៃក្រសួងសុខាភិបាល បានមានប្រសាសន៍នៅព្រឹកថ្ងៃទី ៩ កក្កដា នេះថា គិតមកដល់ត្រីមាសទី ១ ឆ្នាំ ២០២៥ នេះ មានអ្នកផ្ទុកមេរោគអេដស៍ចំនួន ៥០ ៤៣៥ នាក់ ទទួលបានបណ្ណមូលនិធិសមធម៌ពីរាជរដ្ឋាភិបាល ស្មើនឹង ៧១% ក្នុងចំណោមអ្នកព្យាបាលសរុប ៧០ ៦៥៤ នាក់ ហើយ ក្រុមការងារនៅសេវាព្យាបាលដោយឱសថប្រឆាំងមេរោគអេដស៍ នឹងបន្តអនុវត្តនីតិវិធីចុះបញ្ជីបណ្ណមូលនិធិសមធម៌ជាបន្តបន្ទាប់។

លោកវេជ្ជបណ្ឌិត បានបន្តថា ការផ្តល់ប័ណ្ណសមធម៌ជូនដល់អ្នកផ្ទុកមេរោគអេដស៍នេះ នៅមិនទាន់ដឹងថា នឹងបញ្ចប់នៅពេលណាទេ ដោយសារមានអ្នកជំងឺចាស់ និងថ្មី មកស្នើសុំជាបន្តបន្ទាប់ ប៉ុន្តែអ្នកផ្ទុកមេរោគអេដស៍ អាចទទួលបានប័ណ្ណសមធម៌នេះបាន ទាមទារឱ្យចុះបញ្ជីនៅតាមទីតាំងដែលគាត់ទៅទទួលសេវាតាមរយៈថេបប្លែកជាប្រព័ន្ធឌីជីថលតភ្ជាប់ប្រព័ន្ធទិន្នន័យជាមួយក្រសួងផែនការ ហើយការងារនេះ ក៏មានសហការជាមួយអង្គការ យូអេស អេអាយឌី អង្គការយូអិនអេដស៍ អង្គការយូអិនឌីភី។

លោកវេជ្ជបណ្ឌិត បានបន្តទៀតថា អ្នកផ្ទុកមេរោគអេដស៍ទទួលបានប័ណ្ណសមធម៌ពិតជាមានសារៈសំខាន់ណាស់ក្នុងការចូលរួមកាត់បន្ថយការចំណាយច្រើននៅក្នុងគ្រួសារ ព្រោះពួកគាត់ទទួលបានការលើកលែងបង់ប្រាក់ពេលទៅពិនិត្យ និងព្យាបាលជំងឺផ្សេងៗ នៅតាមមន្ទីរពេទ្យរដ្ឋ ដោយរាជរដ្ឋាភិបាលជាអ្នកបង់ថ្លៃជំនួសជួយរួមចំណែកកាត់បន្ថយការចំណាយផ្សេងៗ ក្នុងគ្រួសារ លើកស្ទួយជីវភាពកាន់តែប្រសើរ។

លោកវេជ្ជបណ្ឌិត បានអំពាវនាវដល់អ្នកសង្ស័យថាមានផ្ទុកមេរោគអេដស៍ ត្រូវក្លាហានចេញមកធ្វើតេស្តឈាមរកមេរោគអេដស៍ ដើម្បីទទួលបានការព្យាបាលជំងឺត្រឹមត្រូវ និងទទួលបានប័ណ្ណសមធម៌ ដើម្បីទទួលបានអត្ថប្រយោជន៍ជាច្រើនពីរាជរដ្ឋាភិបាល។ ចំណែកអ្នកផ្ទុកមេរោគអេដស៍ ត្រូវព្យាបាលឱ្យបានទៀងទាត់ជាប់លាប់ និងត្រឹមត្រូវ ពោលគឺអនុវត្តទៅតាមការណែនាំរបស់គ្រូពេទ្យ ហើយកាលណាអ្នកជំងឺព្យាបាលបានត្រឹមត្រូវ នឹងអាចរស់នៅបានយូរអង្វែងដូចប្រជាពលរដ្ឋធម្មតាដែរ។

គួរបញ្ជាក់ថា តាមការប៉ាន់ស្មាននៅឆ្នាំ ២០២៤ កម្ពុជា មានចំនួនអ្នករស់នៅជាមួយមេរោគអេដស៍ប្រមាណ ៧៦ ០០០ នាក់ ក្នុងនោះមានអ្នកជំងឺអេដស៍សកម្មដែលកំពុងទទួលសេវាព្យាបាលដោយឱសថប្រឆាំងមេរោគអេដស៍ទាំង ៧៤ កន្លែង ចំនួន ៧០ ៦៥៤ នាក់ហើយ ប្រហែលនៅសល់អ្នករស់នៅជាមួយមេរោគអេដស៍ជាង ៥ ០០០ នាក់ នៅមិនទាន់បានដឹងខ្លួន និងមិនទាន់បានធ្វើតេស្ត និងទទួលសេវាព្យាបាលនៅឡើយទេ ខណៈក្នុង ១ ឆ្នាំៗ មានអ្នកឆ្លងថ្មី នៃមេរោគអេដស៍ប្រមាណ ១ ២០០ នាក់ និងស្លាប់ប្រមាណ ១ ១០០ នាក់៕

អត្ថបទ ៖ សំអឿន