លោក យឿន យឿត៖ តើការគេចវេសមិនព្រមដោះស្រាយតាមច្បាប់ អាចចាត់ទុកថាក្បត់សីលធម៌ទេ?

ជុំវិញបញ្ហាទំនាស់ កម្ពុជា-ថៃ ទីប្រឹក្សារាជរដ្ឋាភិបាល លោក យឿន យឿត ចោទជាសំណួរចំនួន៤ នៅព្រឹកថ្ងៃទី១១ ខែកក្កដា ឆ្នាំ២០២៥ ចំពោះឥរិយាបថថៃអំឡុងមានជម្លោះជាមួយកម្ពុជាថា៖ “តើការគេចវេសមិនព្រមដោះស្រាយតាមច្បាប់ អាចចាត់ទុកថាក្បត់សីលធម៌ទេ?”។

នៅលើការបង្ហោះលើបណ្តាញសង្គមហ្វេសប៊ុក លោក យឿន យឿត បានចោទជាសំណួរចំនួន ៤។ ទី១ ករណីដែលថៃបានចាញ់ក្តីប្រាសាទព្រះវិហារឆ្នាំ១៩៦២ តែនៅតែបន្តអះអាងថាតុលាការកាត់ក្តីឱ្យតែប្រាសាទ ប៉ុន្តែដីបរិវេណប្រាសាទមិនបានកាត់ក្តីថាឱ្យកម្ពុជាទេ។ តើការអះអាងបែបហ្នឹងគេហៅថាមានក្រមសីលធម៌ទេ? ទី២ ជុំវិញករណី ថៃ ប្រើផែនទីឯកតោភាគី គូសយកប្រាសាទតាមាន់ធំ តាមាន់តូច តាក្របី និង មុំបី នៅខេត្តព្រះវិហារ ទាំងដែលផែនទីដែលមានការទទួលស្គាល់ជាអន្តរជាតិបង្ហាញថាជាទឹកដីខ្មែរ។ លោកថា ៖ “លួចគេ យករបស់គេហ្នឹងត្រឹមត្រូវតាមសីលប្រាំ ឬមានសីលធម៌ទេ?”។

ចំណុចទី៣ លោកចោទសួរថា ថៃ បង្ហោះដ្រូន និងស៊ើបការណ៍ពីកងទ័ពខ្មែរ ហើយទាហានថៃក៏បានលបចូលទឹកដីខ្មែរ សម្លាប់ទាហានខ្មែរម្នាក់បាត់បង់ជីវិតលើទឹកដីកម្ពុជាទៀត តើទង្វើបែបហ្នឹង គេហៅថាមានសីលធម៌ទ? ទី៤ នៅពេលមានបញ្ហាកើតឡើង ភាគីថៃ មិនបានទទួលស្គាល់កំហុង បែរជាចោទប្រកាន់ និងទម្លាក់កំហុសមកលើកម្ពុជាជាច្រើនករណី បង្ខូចកេរ្តិ៍ឈ្មោះកម្ពុជា ហើយចាត់ទុកថាខ្លួនឯងជាជនរងគ្រោះទៅវិញ។ លោក យឿន យឿត ថា តើនេះមានសីលធម៌ទេ?

សូមរម្លឹកថា ជម្លោះព្រំដែនកម្ពុជា  និងថៃ កើតកើតឡើងម្តងទៀត បន្ទាប់ពីមានការឈ្លានពានយ៉ាងគឃ្លើនពីទាហានថៃ កាលពីថ្ងៃទី២៨ ខែឧសភា ឆ្នាំ២០២៥ នៅខេត្តព្រះវិហារ ថែមទាំងបាញ់សម្លាប់ទាហានខ្មែរម្នាក់ស្លាប់ទៀតផង។ ក្រោយពីមានរឿងនេះ ថៃ មិនបានទទួលស្គាល់កំហុសខ្លួនទេ ហើយព្យាយាមចោទប្រកាន់មកប្រទេសកម្ពុជាទៀត។ បើគិតពីពេលកើតហេតុ ដល់បច្ចុប្បន្ន មានរយៈពេលមួយខែជាងហើយរវាងជម្លោះព្រំដែន កម្ពុជា និងថៃ នេះ ប៉ុន្តែនៅមិនទាន់អាចដោះស្រាយបញ្ហាបានឡើយ ហើយថៃ បានប្រកាសដាច់ខាត ថាខ្លួនមិនចូលខ្លួនទៅតុលាការយុត្តិធម៌អន្តរជាតិ ICJ ឡើយ៕