ព័ត៌មានអន្ដរជាតិ

អ្នកស្លាប់ព្រោះទឹកជំនន់នៅតិចសាស់ ឡើងដល់១៣១នាក់ ខណៈការគំរាមកំហែងពីព្យុះថ្មីបានមកដល់

បានផុស

៣ ថ្ងៃ មុន

នៅ

ថ្ងៃអង្គារ ១៥ កក្កដា ២០២៥

ដោយ

Chheang

ចំនួនអ្នកស្លាប់ដោយសារទឹកជំនន់ដ៏មហន្តរាយនៅទូទាំងរដ្ឋតិចសាស់ សហរដ្ឋអាមេរិក បានកើនឡើងដល់ ១៣១នាក់ ហើយនៅពេលនេះ អាជ្ញាធរកំពុងព្រមានថានឹងមានភ្លៀងធ្លាក់ខ្លាំងម្ដងទៀតក្នុងតំបន់ Hill Country ដែលកំពុងញាំញីដោយជំនន់ទឹកភ្លៀងស្រាប់រួចទៅហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គ្រោះមហន្តរាយនៅតិចសាស់ បានចាប់ផ្តើមកាលពីថ្ងៃទី៤ខែកក្កដា ជាមួយភ្លៀងធ្លាក់មិនដល់មួយម៉ោងផង តែបានប្រែក្លាយទន្លេ Guadalupe ទៅជាទឹកជំនន់ដ៏ខ្លាំងក្លា និងបានសម្លាប់មនុស្សជាច្រើននាក់ រួមទាំងកុមារផងដែរ ជាពិសេសនៅជុំរុំបោះតង់ Camp Mystic ដែលជាជុំរុំរដូវក្តៅសម្រាប់ក្មេងស្រីគ្រីស្ទានដែលមានទីតាំងនៅតាមដងទន្លេ។

មនុស្សប្រហែល ៩៧នាក់នៅតែបាត់ខ្លួន ទោះបីជាតួលេខនេះទាបជាងតួលេខកាលពីសប្តាហ៍មុនដែលមានជាង ១៦០នាក់ក៏ដោយ។ ក្រុមជួយសង្គ្រោះមិនបានរកឃើញអ្នកនៅរស់រានមានជីវិតសូម្បីតែម្នាក់ ចាប់តាំងពីគ្រោះទឹកជំនន់លើកដំបូងមកម៉្លេះ ពោលគឺរកឃើញតែសាកសពអ្នកដែលបាត់បង់ជីវិតប៉ុណ្ណោះ ហើយកិច្ចខិតខំប្រឹងប្រែងស្វែងរក នាពេលនេះត្រូវបានរំខានសាជាថ្មីដោយសារព្យុះ និងការកើនឡើងនៃកម្ពស់ទឹក។

គ្រោះទឹកជំនន់នៅតិចសាស់ ម្ដងនេះត្រូវចាត់ទុកជាព្រឹត្តិការណ៍គ្រោះទឹកជំនន់ដ៏សាហាវបំផុតមួយរបស់សហរដ្ឋអាមេរិក ក្នុងរយៈពេលប៉ុន្មានទសវត្សរ៍ចុងក្រោយ ខណៈមានការរិះគន់មួយចំនួនអំពីកង្វះខាតស៊ីរ៉ែនព្រមាន និងគោលនយោបាយកាត់បន្ថយបុគ្គលិករដ្ឋរបស់លោកប្រធានាធិបតី ដូណាល់ ត្រាំ ដែលធ្វើឲ្យតំណែងខ្លះនៅក្នុងការិយាល័យភ្នាក់ងារអាកាសធាតុជាតិខ្វះមនុស្សធ្វើការ៕

ដោយ៖ ឈាង

ចុចអាន៖ ត្រាំ ចុះទៅតំបន់ទឹកជំនន់នៅរដ្ឋតិចសាស់ ចំពេលមានការរិះគន់រដ្ឋាភិបាល