សភាជាតិកាត់បន្ថយចំណាយឆ្នាំ២០២៦ដើម្បីជួយ​ដល់រដ្ឋាភិបាល

ប្រធានគណៈកម្មការ​សេដ្ឋកិច្ច​នៃ​រដ្ឋសភា​លោក ឈាង វុន បានស្នើ​ទៅ​ក្រសួង​សេដ្ឋកិច្ច​ឱ្យ​កាត់​បន្ថយ​ចំណាយសម្រាប់​ការ​គ្រប់​គ្រង​រដ្ឋសភា​ឆ្នាំ២០២៦ធ្វើ​យ៉ាងណា​ឱ្យ​មាន​ការ​សន្សំសំចៃ​ខ្ពស់ ដើម្បី​រួម​ចំណែក​ជួយ​ដល់​រដ្ឋាភិបាល​ក្នុងពេល​ដែល​កម្ពុជា​កំពុង​ប្រឈម​នឹង​ការ​ឈ្លាន​ពាន​ពី​ប្រទេស​ថៃ។

ប្រធាន​គណៈកម្មការ​ទី២ រដ្ឋសភាលោក ឈាង វុន បាន​បញ្ជាក់​ក្នុង​កិច្ច​ប្រជុំជាមួយ​ក្រសួងសេដ្ឋកិច្ច​កាលពី​ថ្ងៃទី​២៩ ខែ​សីហា ថាការ​កាត់​ចំណាយ​របស់​សភា​ឆ្នាំ​២០២៦​នេះ នឹង​អាច​រួម​ចំណែក​ជួយ​ដល់​សមរភូមិមុខ និង​ជន​ភៀសសឹក​មួយ​ចំនួន​ពី​សង្គ្រាម​ផងដែរ។

រដ្ឋលេខាធិការប្រចាំ​ការ​ក្រសួងសេដ្ឋកិច្ច​លោក ជូ វិជិត្ត បាន​ឱ្យ​ដឹង​ថា យោងតាមការព្យាករណ៍សេដ្ឋកិច្ចកិច្ចកម្ពុជា មានកំណើន៦℅ តែថ្មីៗនេះដែលមានជម្លោះព្រំដែនជាមួយប្រទេសថៃ សេដ្ឋកិច្ចកម្ពុជាមានកំណើនថមថយមកនៅត្រឹម៥℅តែប៉ុណ្ណោះ។ តែទោះបីជាយ៉ាងណាក្រសួងសេដ្ឋកិច្ច និងហិរញ្ញវត្ថុ បានផ្តល់ថវិកាយ៉ាងសមរម្យដល់ស្ថាប័នរដ្ឋសភាសម្រាប់ដំណើរការងាររបស់ខ្លួន។

មិនមាន​ព័ត៌មានលំអិតពី​ការ​ចំណាយ​របស់​សភាជាតិ​ក្នុង​មួយ​ឆ្នាំៗទេ ទោះ​ជាយ៉ាងណាបើ​មើលក្នុង​ច្បាប់​ថវិកាជាតិឆ្នាំ​២០២៥​វិញ​ឃើញ​ថា​កម្ពុជាមាន​គម្រោង​ចំណាយ​ប្រមាណ ៩៧០០លានដុល្លារអាមេរិកក្នុង​ឆ្នាំដែល​កើនឡើង២,២%បើធៀបនឹង​ឆ្នាំ២០២៤។

ជម្លោះព្រំដែន​កម្ពុជា​-ថៃ​បាន​ធ្វើ​ឱ្យ​ប៉ះពាល់​ដល់ពលរដ្ឋ​ និង​ការ​ខាត​បង់សេដ្ឋកិច្ចមួយ​ចំនួនផងដែរ ខណៈដែល​ការ​ព្យាករ​សេដ្ឋកិច្ច​ឆ្នាំ​២០២៥​នេះ​មាន​កំណើន​៥%៕

អត្ថបទដោយ ហ៊ុន សិរីវឌ្ឍន៍