អ្នកកើតជាន់ឆ្នាំខាល និងមាន ៣ ឆ្នាំទៀត រាសីមិនល្អក្នុងឆ្នាំខាលនេះ គួរដឹងវិធីបញ្ចៀសគ្រោះ

លោក អ៊ឹម បុរិន្ទ នាយក នៃគណៈកម្មការស្រាវជ្រាវវិជ្ជាហោរាសាស្ត្រ និងប្រពៃណីទំនៀមទម្លាប់ខ្មែរ បានឱ្យ “កម្ពុជាថ្មី” នៅចុងខែមីនា ឆ្នាំ២០២២នេះថា អ្នកកើតឆ្នាំខាល ឆ្នាំនេះ​ គឺរាសីដាក់ ព្រោះឆ្នាំជាន់ឆ្នាំ បើចិន គេហៅថា ឆុងឆ្នាំ។

លោក អ៊ឹម បុរិន្ទ លើកឡើងទៀតថា តាមក្បួនហោរា អ្នកកើតឆ្នាំខាល នៅឆ្នាំនេះ មានរាសី​ការងារ ក៏ដូចជាមុខរបរជួញដូរ ដំណើរការមិនល្អ មានភាពរអាក់រអួលរាំងស្ទះ។

នាយក ​នៃគណៈកម្មការស្រាវជ្រាវវិជ្ជាហោរាសាស្ត្រ និងប្រពៃណីទំនៀមទម្លាប់ខ្មែរ រូបនេះ បានឱ្យដឹងបន្តថា ក្រៅពីអ្នកកើតឆ្នាំខាល ក៏មានមនុស្សកើតនៅ ៣ ឆ្នាំទៀត ក៏មានរាសីរាសីធ្លាក់នៅឆ្នាំខាលនេះដែរ មានដូចជាអ្នកកើត​ឆ្នាំខាល ឆ្នាំម្សាញ់ ឆ្នាំវក និងឆ្នាំកុរ។

ឆ្លើយតបទៅនឹងសំណួរស្ដីពីដំណោះស្រាយសម្រាប់អ្នកកើតឆ្នាំដែលមានរាសីចុះនោះ លោក អ៊ឹម បុរិន្ទ មានប្រសាសន៍ថា ត្រូវប្រើវិធីបញ្ចៀសគ្រោះ គឺពិធីរំដោះគ្រោះ ឬកាត់ឆុង​ ដោយព្រះសង្ឃ ឬគ្រូអាចារ្យដែលចេះវិធី។ លោកបានឱ្យដឹងថា ក៏មានប្រជាពលរដ្ឋនៅរាជធានីភ្នំពេញ និងតាមបណ្ដាខេត្តដែលមានជំនឿ​លើរាសីនេះ បានមកពឹងលោកដល់ផ្ទះ ដើម្បីជួយធ្វើពិធីរំដោះគ្រោះជាបន្តបន្ទាប់។

មហាសង្ក្រាន្ត ឆ្នាំខាល ចត្វាស័ក ពុទ្ធសករាជ ២៥៦៦ គ្រិស្តសករាជ ២០២២ នឹងចូលនៅថ្ងៃព្រហស្បតិ៍ ១៣កើត ខែចេត្រ ត្រូវនឹងថ្ងៃទី១៤ ខែមេសា គ្រិស្ដសករាជ ២០២២ វេលាម៉ោង ១០:០០នាទី។ នៅក្នុងឱកាសសង្ក្រាន្តទាំងបីថ្ងៃ សូមអស់ប្រជាពលរដ្ឋប្រុសស្រីផងទាំងឡាយ ខំលះបង់ចិត្តអាក្រក់អន្យតិ​រ្ថិយជាចិត្តអប្រិយជាប់ដោយគំនុំគុំកួនព្យាបាទ ឈ្នានីស ដែលកើតមានក្នុងឆ្នាំចាស់ឱ្យជ្រះស្រឡះ តាំងចិត្តប្រព្រឹត្តល្អប្រកបដោយ មេត្តា ករុណា មុទិតា ឧបេក្ខា និង បញ្ញា ធ្វើបុណ្យសុន្ទរ៍ទាន ឬទានល្អតាមប្រពៃណី រក្សាសីលប្រាំឱ្យបានជាប់ជានិច្ច នោះទេវតានឹងឱ្យពរសព្ទសាធុការ លោកអ្នកនឹងមានសិរីសួស្តី សុភមង្គល វិបុលសុខគ្រប់ប្រការតាំងពីឆ្នាំថ្មីនេះតរៀងទៅ៕

អត្ថបទ៖ ច័ន្ទ វីរៈ