កម្ពុជា​រក​ចំណូល​បាន​ជិត $៤ ​ពាន់​លាន ​ពី​ការ​នាំចេញ​កសិផល​នៅ ​៣ ​ត្រីមាស​ឆ្នាំនេះ

នៅ​ក្នុង​រយៈ​ពេល ​៣ ត្រីមាស​ឆ្នាំ ២០២៥ ​​កម្ពុជា​រក​ប្រាក់​ចំណូល​បាន​ជិត​ ៤ ​ពាន់​លាន​ដុល្លារ ពី​ការ​នាំ​ចេញ​កសិផល​ជាង​១១ លាន​តោន ទៅទីផ្សារអន្តរជាតិ។

​របាយការណ៍​របស់អគ្គនាយកដ្ឋានកសិកម្ម នៃ​ក្រសួង​កសិកម្ម រុក្ខា​ប្រមាញ់ និង​នេសាទ បង្ហាញថា ក្នុងរយៈពេល ៩ ខែ ការនាំចេញកសិផល​ទៅក្រៅប្រទេស មានបរិមាណសរុប ១១ ១៣១ ៦៨១ តោន ក្នុងនោះផលិតផលដំណាំក្រៅពីស្រូវ-អង្ករចំនួន ៥ ២៨៧ ៣៤៥ តោន ស្រូវចំនួន ៥ ២៤៧ ៩៩២ តោន និងអង្ករចំនួន ៥៩៦ ៣៤៣ តោន ទៅកាន់ទិសដៅ ៨៨ ប្រទេស កើនឡើង ៣០,៤៣% ធៀបនឹងរយៈពេលដូចគ្នានៅឆ្នាំ ២០២៤។

ប្រភពដដែល បង្ហាញថា ការប៉ាន់ស្មានតម្លៃគិតជាទឹកប្រាក់ចំនួន ៣,៨៨ ពាន់លានដុល្លារ ក្នុងនោះការនាំចេញស្រូវមានតម្លៃ ១,០៥ ពាន់លានដុល្លារ និងអង្ករមានតម្លៃជាង ៤៥៥ លានដុល្លារ និងផលិតផលក្រៅពីស្រូវអង្ករជាង ២,៣៧ ​ពាន់លានដុល្លារ។

លោក ងិន ឆាយ អគ្គនាយក នៃអគ្គនាយកដ្ឋានកសិកម្ម មានប្រសាសន៍ថា ស្ថានភាពនៃការនាំចេញកសិផលនៅក្នុង រយៈពេល ៩ ខែ ឆ្នាំ ២០២៥ មានការកើនឡើងចំនួនប្រមាណ ២,៥៩ លានតោន។

លោក ងិន ឆាយ បន្ថែមថា៖ «បន្ទាប់ពីមានការបិទច្រកព្រំដែនគោកជាឯកតោភាគីរបស់ថៃ កម្ពុជាបាននាំចេញផលិត ផលកសិកម្មទៅប្រទេសថៃតាមផ្លូវទឹកមានចំនួន ១ ពាន់ ៧០០ តោន ស្មើនឹងប្រមាណ ៥,៨០ លានដុល្លារ»៕

អត្ថបទ៖ ឡេង ដេត