វៀតណាមរំពឹង​ចុះកិច្ចព្រមព្រៀងពាណិជ្ជកម្មបដិការជាមួយអាមេរិកជាផ្លូវការឆាប់ៗនេះ

ឧបនាយករដ្ឋមន្ត្រីវៀតណាម លោក​ ប៊ូយ ថាញ់ សឺន (Bui Thanh Son) ​បាន​ឱ្យដឹងនៅថ្ងៃពុធនេះ​ថា វៀតណាមរំពឹង​ពីការ​ចុះហត្ថលេខាជាផ្លូវការ​លើ «កិច្ចព្រមព្រៀងពាណិជ្ជកម្ម​បដិការ​» ជាមួយសហរដ្ឋ​អាមេរិក ក្នុងពេលឆាប់ៗនេះ ចំពេលដែល​ការចរចាជុំថ្មី​កំពុងដំណើរការនៅទីក្រុងវ៉ាស៊ីនតោនឌីស៊ី។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សឺន បាន​និយាយក្នុងកិច្ចប្រជុំកំពូលធុរកិច្ចអាមេរិក-វៀតណាម នៅទីក្រុងហាណូយ ថា៖ «មានតែការជឿទុកចិត្តប៉ុណ្ណោះ ដែលអាចនាំទៅរកកិច្ចសហប្រតិបត្តិការ ហើយមានតែកិច្ចសហប្រតិបត្តិការប៉ុណ្ណោះដែលអាចនាំទៅរកវិបុលភាព​ ហើយវៀតណាមតែងតែស្វែងរកការជំរុញកិច្ចសហប្រតិបត្តិការជាមួយសហរដ្ឋអាមេរិក»។

គួររំឭកថា កាលពីខែតុលា ពោលគឺអំឡុងកិច្ចប្រជុំកំពូលអាស៊ាន ប្រទេសទាំង២​បានព្រមព្រៀងគ្នាបញ្ចប់កិច្ចព្រមព្រៀងពាណិជ្ជកម្ម​ ក្រោមលក្ខខណ្ឌផ្សេងៗ រួមទាំងការដាក់ពន្ធ ២០% លើទំនិញវៀតណាម និងការលើកលែងពន្ធលើទំនិញមួយ​ចំនួន។ ​

នៅកិច្ចប្រជុំនៅថ្ងៃពុធនេះ លោក សឺន បានអំពាវនាវដល់អាជីវកម្មអាមេរិកឱ្យគាំទ្រដំណើរទស្សនកិច្ចទៅកាន់សហរដ្ឋអាមេរិករបស់មេដឹកនាំវៀតណាម លោក To Lam ហើយក៏លើកទឹកចិត្តទីក្រុងវ៉ាស៊ីនតោនឱ្យទទួលស្គាល់វៀតណាមជា «ប្រទេសសេដ្ឋកិច្ចទីផ្សារ» ​ជាដើម៕