ក្រសួងយុត្តិធម៌ស៊ើបអង្កេតប្រធានធនាគារកណ្តាលអាមេរិក បង្កក្ដីបារម្ភសម្រាប់វិនិយោគិន

ប្រធានធនាគារកណ្តាលសហព័ន្ធអាមេរិក លោក ជេរ៉ូម ផៅវ៉ែល (Jerome Powell) បាន​បញ្ជាក់កាលពីយប់ថ្ងៃអាទិត្យ​ថា រដ្ឋអាជ្ញាសហព័ន្ធនៃក្រសួងយុត្តិធម៌អាមេរិកបាន​​បើកការស៊ើបអង្កេតព្រហ្មទណ្ឌលើ​រូបលោក​។ នេះបើតាមការចុះផ្សាយរបស់សារព័ត៌មាន​អាមេរិកនានា។

គេមើលឃើញថា បញ្ហានេះកំពុងគំរាមកំហែងលើឯករាជ្យភាពរបស់ធនាគារកណ្ដាល ដោយ​បង្កក្ដីបារម្ភសម្រាប់វិនិយោគិន ដែលអាចឱ្យពួកគេងាកចេញពីការវិនិយោគលើទ្រព្យសម្បត្តិអាមេរិក។

លោក ផៅវ៉ែល បាន​ថ្លែងបញ្ជាក់ក្នុងសារវិដេអូមួយ ដែល​ចេញផ្សាយដោយធនាគារកណ្តាលសហព័ន្ធថា ការស៊ើបអង្កេតរបស់ក្រសួងយុត្តិធម៌ គឺទាក់ទងនឹងសក្ខីកម្មរបស់លោក​​កាលពីខែមិថុនាឆ្នាំមុន អំពីការជួសជុលអគារធនាគារកណ្តាលដែលត្រូវបើរយៈពេលយូរឆ្នាំ។

យ៉ាងណាមិញ លោក ផៅវ៉ែល ជឿថា ការវិវត្តចុងក្រោយនេះ ​គឺជាផ្នែកមួយ​នៃយុន្ធនាការដាក់សម្ពាធលើ​ធនាគារកណ្ដាលរបស់លោកប្រធានាធិបតី ដូណាល់ ត្រាំ ដែលតែងតែទទូចឱ្យលោក ផៅវ៉ែល ទម្លាក់អត្រាការប្រាក់។

លោក ផៅវ៉ែល ​បានថ្លែងថា បញ្ហានេះឆ្លុះបញ្ចាំងឱ្យឃើញថា តើធនាគារកណ្ដាលអាមេរិក​នឹងអាចបន្តកំណត់អត្រាការប្រាក់ដោយផ្អែកលើភស្តុតាង និងលក្ខខណ្ឌសេដ្ឋកិច្ច​ខ្លួនឯង ឬក៏ការសម្រេចរបស់ខ្លួនត្រូវនាំមុខដោយ​ «សម្ពាធ​ ឬការគំរាមកំហែង​នយោបាយ?»​។

មកទល់ពេលនេះ មិនទាន់មាន​ព័ត៌មាន​លម្អិតណាមួយ ស្ដីពីការស៊ើបអង្កេតនៅឡើយទេ ប៉ុន្តែអ្នកនាំពាក្យរបស់លោកស្រីអគ្គរដ្ឋអាជ្ញារអាមេរិក Pam Bondi បាន​ឱ្យដឹងថា លោកស្រីបាន​ណែនាំមេធាវីអាមេរិក​ «ឱ្យផ្តល់អាទិភាពដល់ការស៊ើបអង្កេតលើការរំលោភបំពានណាមួយ» ចំពោះការប្រើប្រាស់ថវិការបស់ធនាគារកណ្ដាល។ នេះបើតាមបណ្ដាញព័ត៌មាន ABC។

​ដោយឡែកលោក ត្រាំ ឯណោះវិញ បានបដិសេធការជាប់ពាក់ព័ន្ធណាមួយ​ក្នុងការស៊ើបអង្កេតព្រហ្មទណ្ឌ​ អំឡុង​បទសម្ភាសន៍ខ្លីមួយជាមួយសារព័ត៌មាន​ NBC News កាលពីយប់ថ្ងៃអាទិត្យ។ លោកថ្លែងថា៖ «​ខ្ញុំមិនដឹងអ្វីទាំងអស់អំពីវាទេ ប៉ុន្តែលោក(ផៅវ៉ែល)ពិតជាមិនសូវពូកែនៅធនាគារកណ្ដាល​ទេ ហើយ​លោក​ក៏មិនពូកែខាងសាងសង់អគារដែរ»។ ប៉ុន្តែកន្លងមក លោក ត្រាំ បានគំរាមប្ដឹងលោក ផៅវ៉ែល រួចស្រាប់ហើយជុំវិញការជួសជុលអគារនេះ ថាវាត្រូវប្រើប្រាស់ថវិកាច្រើនពេក។

ជុំវិញបញ្ហាអត្រាការប្រាក់ លោក ត្រាំ បា​នថ្លែងយ៉ាងដូច្នេះថា៖ «​​អ្វីដែលគួរដាក់សម្ពាធលើ​លោក គឺការពិតដែលថាអត្រាការប្រាក់ខ្ពស់ពេក។ នោះជាសម្ពាធតែមួយគត់ដែលលោកត្រូវទទួលបាន»​។ លោក ត្រាំ បន្ថែមថា លោក ផៅវ៉ែល «បានធ្វើឱ្យមនុស្សជាច្រើនរងគ្រោះ។ ខ្ញុំគិតថាសាធារណជនកំពុងដាក់សម្ពាធលើគាត់»។

កន្លងមក លោក ត្រាំ ទទូចហើយទទូចទៀត ឱ្យលោក ផៅវ៉ែល ទម្លាក់អត្រាការប្រាក់លើសពីអត្រាដែលធនាគារកណ្ដាលបាន​ធ្វើនាពេលកន្លងមក​​។ ប៉ុន្តែលោក ផៅវ៉ែល ទទូចថា គោលនយោបាយរបស់ខ្លួនគឺផ្អែកលើស្ថានភាពសេដ្ឋកិច្ចអាមេរិក ដោយ​ធនាគារកណ្ដាលនៅតែបន្តឃ្លាំមើលអតិផរណា ដែលនៅតែបន្តខ្ពស់ជាងអត្រាគោលដៅ ២% របស់ធនាគារ។

ការដាក់សម្ពាធរបស់លោក ត្រាំ បាន​ប៉ះពាល់ដល់ឯករាជ្យភាពរបស់ធនាគារកណ្ដាល ដែលបង្កក្ដីបារម្ភសម្រាប់វិនិយោគិន ពាក់ព័ន្ធនឹង​ហានិភ័យ​ទីផ្សារ។ ការណ៍នេះ រួមចំណែកដល់ការធ្លាក់ចុះដល់ប្រាក់ដុល្លារ ហើយអាចបង្កការប្រែប្រួលរហ័សសម្រាប់ទីផ្សារហ៊ុនអាមេរិក នៅពេលវិនិយោគិនកាត់បន្ថយ ឬដកការវិនិយោគលើទ្រព្យសម្បត្តិអាមេរិកដោយសារកង្វះទំនុកចិត្ត។ យ៉ាងណាមិញ បញ្ហាដដែលរួមចំណែកដល់ការហក់ឡើងនៃតម្លៃមាស ដែលគេរាប់ចាត់ទុកថាជាទ្រព្យសម្បត្តិសុវត្ថិភាព ពេលមាន​ភាពមិនប្រាកដប្រជានៃនយោបាយ និងសេដ្ឋកិច្ច។

គួរគូសបញ្ជាក់ថា អាណត្តិរបស់លោក ផៅវ៉ែល ជាប្រធានធនាគារកណ្តាលអាមេរិកនឹងបញ្ចប់នៅខែឧសភា ប៉ុន្តែលោកនឹងនៅតែជាសមាជិកក្រុមប្រឹក្សាភិបាលនៃធនាគារដដែល រហូតដល់ឆ្នាំ ២០២៨៕