អាមេរិកគ្រោងដំឡើងពន្ធលើ «ប្រទេសមួយចំនួន» ១៥% ​ក្រោយពន្ធ ១០% ចូលជាធរមាន

តំណាងពាណិជ្ជកម្មសហរដ្ឋអាមេរិក លោក Jamieson Greer បាន​ឱ្យដឹងកាលពីថ្ងៃពុធ (២៥ កុម្ភៈ) ថា អាមេរិក​នឹង​ដំឡើងពន្ថលើប្រទេសមួយចំនួនដល់ ១៥% ឬខ្ពស់ជាងនោះ ប៉ុន្តែលោក​មិន​បាន​បញ្ចេញឈ្មោះប្រទេសណាមួយ ឬព័ត៌មាន​លម្អិត​បន្ថែម​នោះទេ។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

ការឱ្យដឹងយ៉ាងដូច្នេះ ធ្វើឡើងបន្ទាប់ពីពន្ធថ្មី ១០% បា​នចូលជាធរមាននៅថ្ងៃអង្គារ ដោយទាបជាងអត្រា ១៥% ដែលលោកប្រធានាធិបតី ដូណាល់ ត្រាំ បាន​គំរាមដាក់នៅថ្ងៃសៅរ៍សប្ដាហ៍មុន ពោលគឺ ១ ថ្ងៃ ក្រោយតុលាការកំពូលអាមេរិក​សម្រេចចាត់ទុកពន្ធបដិការរបស់ ត្រាំ ថាខុសច្បាប់ និងត្រូវដកចេញ។

លោក Greer បានប្រាប់​បណ្ដាញទូរទស្សន៍ Fox Business Network ថា រដ្ឋបាលលោក ត្រាំ មិនមានបំណងដំឡើងពន្ធលើទំនិញចិនលើសពីកម្រិតបច្ចុប្បន្នទេ ​ចំពេលដែលលោក ត្រាំ មានគម្រោងធ្វើដំណើរទៅកាន់ប្រទេសចិន​នៅប៉ុន្មានសប្ដាហ៍ខាងមុខ។

លោក​ថ្លែងយ៉ាងដូច្នេះបន្តថា៖ «ឥឡូវនេះ យើងមានពន្ធគយ ១០%។ វានឹងឡើងដល់ ១៥% សម្រាប់ប្រទេសមួយចំនួន ហើយបន្ទាប់មក វាអាចនឹងឡើងខ្ពស់ជាងនេះសម្រាប់​ប្រទេសផ្សេងទៀត ហើយខ្ញុំគិតថា វានឹងស្របតាមប្រភេទពន្ធគយដែលយើងបានឃើញ»។

ក្រោយមកទៀត ថ្លែងប្រាប់​ Bloomberg TV លោក Greer បាននិយាយថា សេតវិមានកំពុងរៀបចំសេចក្តីប្រកាសមួយដើម្បីបង្កើនពន្ធគយបណ្តោះអាសន្នដល់ ១៥% លើ «ប្រទេសដែលសាកសម​»។ លោកបានបន្ថែមថា អាមេរិក​នឹង «សម្របសម្រួល» ជាមួយប្រទេសដែលមានកិច្ចព្រមព្រៀងពាណិជ្ជកម្ម ប៉ុន្តែមិនបានផ្តល់ព័ត៌មានលម្អិតទេ។

លោកបានបន្តទៀត​ថា រដ្ឋបាល ត្រាំ ចង់ធ្វើឱ្យប្រាកដថា ខ្លួនបន្តដំណើរការផ្លូវច្បាប់ត្រឹមត្រូវសម្រាប់ការបង្កើនពន្ធនាពេលនេះ ដើម្បីបញ្ចៀសបញ្ហាផ្លូវច្បាប់ផ្សេងៗ។ ​

គួរគូសបញ្ជាក់ថា ពន្ធ ១០% ដែលចូលជាធរមាននៅថ្ងៃអង្គារ ត្រូវបានដាក់ចេញក្រោម​ច្បាប់​ពាណិជ្ជកម្ម​ឆ្នាំ ១៩៧៤ ដែលអនុញ្ញាតឱ្យប្រធានាធិបតីដាក់ពន្ធរយៈពេល ១៥០ ថ្ងៃ បើផុតពីនោះ ត្រូវសុំការអនុម័តពីសភា៕

​