ព័ត៌មានអន្ដរជាតិ

វៀតណាមអាចខ្វះខាតប្រេងយន្តហោះចាប់ពីខែមេសា ដោយសារជម្លោះមជ្ឈិមបូព៌ា

បានផុស

៤ ខែ មុន

នៅ

ថ្ងៃព្រហស្បតិ៍ ១២ មីនា ២០២៦

ដោយ

រដ្ឋាភិបាលវៀតណាមបានឱ្យដឹងកាលពីថ្ងៃពុធថា ក្រុមហ៊ុនអាកាសចរណ៍វៀតណាមអាចប្រឈមនឹងហានិភ័យនៃកង្វះខាតប្រេងឥន្ធនៈសម្រាប់យន្តហោះចាប់ពីខែមេសាតទៅ ដោយសារជម្លោះមជ្ឈិមបូព៌ាដែលកំពុងបន្ត។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋាភិបាលបាននិយាយក្នុងសេចក្តីថ្លែងការណ៍មួយថា អ្នកផ្គត់ផ្គង់ប្រេងឥន្ធនៈក្នុងស្រុកអាចធានាការចែកចាយបានត្រឹមតែចុងខែនេះប៉ុណ្ណោះ ខណៈអ្នកផ្គត់ផ្គង់មួយចំនួនបានចាប់ផ្តើមពន្យារពេលចែកចាយរួចទៅហើយដោយសារហេតុផលផ្សេងៗគ្នារួចហើយ។

សេចក្តីថ្លែងការណ៍បានដកស្រង់សម្តីរបស់អាជ្ញាធរអាកាសចរណ៍ស៊ីវិលវៀតណាម (CAAV) ដែលនិយាយថា៖ «ហានិភ័យនៃកង្វះខាតប្រេងឥន្ធនៈអាកាសចរណ៍សម្រាប់ក្រុមហ៊ុនអាកាសចរណ៍វៀតណាមចាប់ពីខែមេសាតទៅ និងក្នុងខែបន្តបន្ទាប់ទៀត គឺជាការពិត»។

CAAV បានស្នើឱ្យរដ្ឋាភិបាលអនុញ្ញាតឱ្យក្រុមហ៊ុនអាកាសចរណ៍ដំឡើងថ្លៃសំបុត្រយន្តហោះ ដើម្បីឆ្លើយតបទៅនឹងកំណើននៃតម្លៃប្រេងឥន្ធនៈ។

គួរគូសបញ្ជាក់ថា ជម្លោះរវាងអ៊ីស្រាអែល សហរដ្ឋអាមេរិក និងអ៊ីរ៉ង់ បានបង្កការហក់ឡើងនៃតម្លៃប្រេងឆៅ និងប្រេងសាំងទូទាំងពិភពលោក ហើយដើម្បីជាការឆ្លើយតប វៀតណាមបានលុបចោលពន្ធនាំចូលលើប្រេងឥន្ធនៈ ហើយក៏កំពុងស្វែងរកការកាត់បន្ថយពន្ធបរិស្ថានរហូតដល់ខែឧសភា ដើម្បីគាំទ្រដល់ក្រុមហ៊ុនអាកាសចរណ៍៕