ឧកញ៉ា លឹម ហេង គាំទ្រឲ្យវិស័យ​ឯកជននាំចូលថ្នាំព្យាបាលជំងឺកូវីដទទួលស្គាល់ពីរដ្ឋាភិបាល និងWHO

បើទោះជារាជរដ្ឋាភិបាល បានប្រកាសទិញថ្នាំព្យាបាលជំងឺកូវីដ-១៩ ទុកសម្រាប់ព្យាបាលមនុស្សចំនួន ៥ម៉ឺននាក់ នៅកម្ពុជាយ៉ាងណាក្តី ក៏លោកឧកញ៉ា លឹម ហេង គាំទ្រវិស័យឯកជនដែលមានបំណងចង់នាំចូលចែកចាយថ្នាំនេះដែរនៅកម្ពុជា ដើម្បីរួមចំណែកជាមួយរាជរដ្ឋាភិបាល។

លោកឧកញ៉ា លឹម ហេង អនុប្រធាន​សភាពាណិជ្ជកម្ម​កម្ពុជា បានលើកឡើងថា ប្រជាជនកម្ពុជា មានភ័ព្វសំណាង ដែលមានរាជរដ្ឋាភិបាល​យកចិត្តតាំងពីដើមមក ពោលគឺរដ្ឋបានទិញវ៉ាក់សាំងចាក់ជូនពលរដ្ឋខ្មែរបានគ្រប់ចំនួនកំណត់ និងបានប្រកាសទិញថ្នាំព្យាបាលជំងឺកូវីដ-១៩ បន្ថែមទៀត ដើម្បីព្យាបាលជូនពលរដ្ឋ។ លើសពីនេះទៀត លោក ឧកញ៉ា បានលើកឡើងថា ប្រសិនបើក្រុមហ៊ុនឯកជនអាច​នាំចូលថ្នាំព្យាបាលជំងឺកូវីដបាន ដែលមានការអនុញ្ញាតដោយអង្គការសុខភាពពិភពលោក និងទទួលស្គាល់ពីរាជរដ្ឋាភិបាល កាន់តែបង្កភាពងាយស្រួលសម្រាប់អ្នកព្យាបាលនៅតាមផ្ទះ។

ប៉ុន្តែមកដល់ពេលនេះ ក្រសួងសុខាភិបាល មិនទាន់ប្រកាសឈ្មោះក្រុមហ៊ុនឯកជនណាមួយដែលទទួលសិទ្ធិទិញថ្នាំព្យាបាលជំងឺកូវីដ-១៩ ដែលទទួលស្គាល់ពីអង្គការសុខភាពពិភពលោកនៅឡើយទេ។

ទោះយ៉ាងណា គេឃើញមានប្រភេទថ្នាំព្យាបាលជំងឺកូវីដ-១៩ផ្សេងៗ បានដាក់លក់នៅលើទីផ្សារអនឡាញ ក្នុងតម្លៃខ្ពស់ និងមិនមានការបញ្ជាក់ពី​ក្រសួងសុខាភិបាល​នោះទេ។ ពលរដ្ឋជាច្រើនកំពុងពិចារណាក្នុងការទិញថ្នាំព្យាបាលជំងឺកូវីដនេះនៅលើបណ្តាញសង្គម។

ពាក់ព័ន្ធនឹងបញ្ហានេះ អនុប្រធាន​សភាពាណិជ្ជកម្ម​កម្ពុជា បានផ្តល់ជាយោបល់ថា មុនសម្រេចចិត្តទិញថ្នាំព្យាបាលជំងឺកូវីដនៅលើអនឡាញ ពលរដ្ឋត្រូវពិនិត្យឲ្យបានច្បាស់ថាតើថ្នាំនេះ មានការចុះបញ្ជីពីក្រសួងពាក់ព័ន្ធហើយឬនៅ? ជៀសវាងការចាញ់បោកអ្នកលក់ និងងាយប៉ះ​ពាល់សុខភាព។

សូមបញ្ជាក់ថា កាលពីថ្ងៃទី ០១ ខែវិច្ឆិកា ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានប្រកាសថា ជាជំហានដំបូងរាជរដ្ឋាភិបាល នឹងបញ្ជាទិញថ្នាំព្យាបាលជំងឺកូវីដ-១៩ពីសហរដ្ឋអាមេរិក សម្រាប់មនុស្សចំនួន ៥ម៉ឺននាក់ ដោយថ្នាំនេះ ១នាក់ ត្រូវចំណាយអស់៥០ដុល្លារ ដែលសរុបចំនួនទាំង៥ម៉ឺននាក់ ត្រូវចំណាយថវិកាអស់ចំនួន ២លាន៥សែន ដុល្លារសហរដ្ឋអាមេរិក។

ថ្នាំនេះត្រូវបានគេដឹងថា ជាថ្នាំព្យាបាលកូវីដដែលកំពុងល្បីខ្លាំងឈ្មោះ Molnupiravir ហើយមកទល់ពេលនេះ មានប្រទេសជាច្រើនកំពុង​បញ្ជាទិញ ដោយសារតែប្រសិទ្ធភាពដ៏ល្អរបស់ថ្នាំ។

ថ្នាំរបស់ក្រុមហ៊ុន Merck នេះ មានសមត្ថភាពព្យាបាលជំងឺកូវីដ-១៩ កម្រិតស្រាលទៅមធ្យម ចំពោះមនុស្សពេញវ័យ ដែលបានធ្វើតេស្តវិជ្ជមាន និងអ្នកដែលមានហានិភ័យខ្ពស់ នៃការវិវត្តទៅជាជំងឺធ្ងន់ធ្ងរ ហើយអាចកាត់បន្ថយអត្រានៃការចូលព្យាបាលក្នុងមន្ទីរពេទ្យនិងស្លាប់បាន ៥០%៕

អត្ថបទ៖ ទួន សុផល