សេដ្ឋកិច្ច

ចិនអនុម័តឱ្យចម្ការមៀនកម្ពុជាចំនួន ៧៤ និងរោងចក្រ ៨ នាំផ្លែមៀនស្រស់ទៅទីផ្សារចិន

បានផុស

៤ years មុន

នៅ

ថ្ងៃព្រហស្បតិ៍ ៨ កញ្ញា ២០២២

ដោយ

អគ្គរដ្ឋបាលគយនៃសាធារណរដ្ឋប្រជាមានិតចិន (GACC) នៅថ្ងៃទី ៧ ខែកញ្ញា ឆ្នាំ ២០២២នេះ បានសម្រេចអនុម័តទទួលស្គាល់ ជាផ្លូវការនូវបញ្ជីឈ្មោះចម្ការមៀនចំនួន ៧៤ និងរោងចក្រវេចខ្ចប់ចំនួន ៨ ដែលបានចុះបញ្ជីសម្រាប់នាំចេញផ្លែមៀនស្រស់កម្ពុជាទៅកាន់ប្រទេសចិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការសម្រេចអនុម័តទទួលស្គាល់ពីភាគីចិនកើតមានឡើង បន្ទាប់ពីកម្ពុជាបានស្នើទៅ អគ្គរដ្ឋបាលគយនៃសាធារណរដ្ឋប្រជាមានិតចិនចរចាលក្ខខណ្ឌតម្រូវភូតគាមអនាម័យបើកទីផ្សារនាំចេញផ្លែមៀនរយៈពេល ជាង ៣ ឆ្នាំកន្លងមក។

ក្រសួងកសិកម្ម រុក្ខាប្រមាញ់ និងនេសាទ អះអាងថា ផ្លែមៀនស្រស់កម្ពុជាគឺជាផ្លែឈើស្រស់ទី៣បន្ទាប់ពីផ្លែចេកស្រស់និងផ្លែស្វាយស្រស់ ដែលអាចនាំចេញទៅប្រទេសចិនដោយផ្ទាល់។ នេះគឺជាសមិទ្ធិផលផ្លែផ្កាថ្មីមួយទៀត ដែលកើតពីកិច្ចសហប្រតិបត្តិការដ៏ល្អប្រសើររវាងព្រះរាជាណាចក្រកម្ពុជានិងសាធារណរដ្ឋប្រជាមានិតចិន។

ក្រសួងក៏អំពាវនាវឱ្យសាធារណជន និងអ្នកពាក់ព័ន្ធទាំងអស់ បន្តសហការជាមួយក្រសួងកសិកម្ម រុក្ខាប្រមាញ់ និងនេសាទ ដើម្បីជំរុញការនាំចេញផ្លែមៀនទៅកាន់ប្រទេសចិនឱ្យទទួលបានជោគជ័យ នាពេលខាងមុខដ៏ខ្លីនេះ។

សូមរំឭកថា ក្រសួងកសិកម្មបានចាប់ផ្តើមទំនាក់ទំនងចរចាលក្ខខណ្ឌតម្រូវភូតគាមអនាម័យបើកទីផ្សារជាមួយអគ្គរដ្ឋបាលគយនៃសាធារណរដ្ឋប្រជាមានិតចិនតាំងពីដើមឆ្នាំ២០១៩ ហើយរហូតដល់ថ្ងៃទី ១៦ ខែមីនា ឆ្នាំ២០២២ ទើបទទួលបានការឯកភាព និងចុះហត្ថលេខាលើពិធីសារស្តីពីលក្ខខណ្ឌតម្រូវភូតគាមអនាម័យសម្រាប់ការនាំចេញផ្លែមៀនស្រស់ពីកម្ពុជាទៅកាន់ប្រទេសចិន។

នៅឆ្នាំ២០២១ដំណាំមៀននៅទូទាំងប្រទេស មានផ្ទៃដីដាំដុះសរុបចំនួន ១២ ៨៣៧ហ.ត ផ្ទៃដីប្រមូលផលមានចំនួន ១០ ៥៦៥ហ.ត ដោយទទួលទិន្នផលជាមធ្យមចំនួន១២,៤៤៧តោន/ហ.ត ដែលមានបរិមាណផលសរុបចំនួនប្រមាណ១៣១៤៩៨តោន៕