សេដ្ឋកិច្ច

សមាគមមៀនប៉ៃលិន រំពឹងការនាំចេញផ្លែមៀនស្រស់ទៅចិន ជួយដោះស្រាយបញ្ហាកកស្ទះមៀនរបស់កសិករឆ្នាំនេះ

បានផុស

៤ years មុន

នៅ

ថ្ងៃពុធ ១៤ កញ្ញា ២០២២

ដោយ

បន្ទាប់ពីភាគីចិនបានអនុម័តទទួលស្គាល់ និងចុះបញ្ជីចម្ការមៀនកម្ពុជាចំនួន ៧៤ និងរោងចក្រវេចខ្ចប់ចំនួន ៨ កាលពីពេលថ្មីៗ កសិករដាំមៀនប៉ៃលិន រំពឹងថានឹងអាចជួយដោះស្រាយបញ្ហាកកស្ទះទីផ្សារមៀននៅកម្ពុជាបានមួយកម្រិតទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សួន ជុំ អនុប្រធានសមាគមមៀនប៉ៃលិនប្រាប់កម្ពុជាថ្មីនៅថ្ងៃពុធ ១៤ កញ្ញានេះថា ប្រសិនបើការនាំចេញផ្លែមៀនទៅកាន់ប្រទេសចិនដំណើរការនោះគឺអាចជួយដោះស្រាយបញ្ហាកកស្ទះផ្លែមៀនប៉ៃលិនបានមួយកម្រិតបន្ថែមទៀតដោយសារទីផ្សារផលិតមៀនក្នុងស្រុកមានភាពចង្អៀតនាពេលបច្ចុប្បន្ន។

លោក សួន ជុំ ប្រាប់ថា រូបលោកក៏កំពុងរង់ចាំមើលដំណើរការនាំចេញផ្លែមៀននៅពេលដ៍ខ្លីខាងមុខនេះដែរ ខណៈស្ថានភាពភាគរយនៃធ្វើចម្កាមៀនរបស់កសិករឆ្នាំនេះនៅតែមានភាពល្អប្រសើរ។

ចំពោះតម្លៃមៀននៅឆ្នាំនេះ លោក បានឱ្យដឹងថា តម្លៃ ៣ ៦០០ រៀល ក្នុង១គីឡូ ដែលជាតម្លៃដើមរដូវ រហូតដល់ ៤ ០០០ រៀល ដែលលោក សួន ជុំ បញ្ជាក់ថា ជាតម្លៃដែលអាចទទួលយកបានបើទោះបីមិនទទួលបានផលចំណេញច្រើនដោយសារការឡើងថ្លៃជីក៏ដោយ។ ផ្លែមៀនស្រស់កម្ពុជាគឺជាផ្លែឈើស្រស់ទី ៣ បន្ទាប់ពីផ្លែចេកស្រស់ និងផ្លែស្វាយស្រស់ ដែលអាចនាំចេញទៅប្រទេសចិនដោយផ្ទាល់។

នៅថ្ងៃទី៧ ខែកញ្ញា ឆ្នាំ២០២២ អគ្គរដ្ឋបាលគយនៃសាធារណរដ្ឋប្រជាមានិតចិន (GACC) បានអនុម័តទទួលស្គាល់ជាផ្លូវការនូវបញ្ជីឈ្មោះចម្ការមៀនចំនួន ៧៤ និងរោងចក្រវេចខ្ចប់ចំនួន ៨ ដែលបានចុះបញ្ជីសម្រាប់នាំចេញផ្លែមៀនស្រស់កម្ពុជាទៅកាន់ប្រទេសចិន។

ឆ្នាំ២០២១ ដំណាំមៀននៅទូទាំងប្រទេស មានផ្ទៃដីដាំដុះសរុបចំនួន ១២ ៨៣៧ហ.ត ផ្ទៃដីប្រមូលផលមានចំនួន ១០ ៥៦៥ហ.ត ដោយទទួលទិន្នផលជាមធ្យមចំនួន១២,៤៤៧តោន/ហ.ត ដែលមានបរិមាណផលសរុបចំនួនប្រមាណ១៣១៤៩៨តោន។

ខេត្តបាត់ដំបង និងខេត្តប៉ៃលិន មានផ្ទៃដីដាំដុះមៀនច្រើនជាងគេក្នុងនោះ ខេត្តបាត់ដំបងមានផ្ទៃដី ៦ ៦៣៥ ហិកតា ខណៈខេត្តប៉ៃលិន ៣ ៣៦០ ហិកតា។ នេះបើតាមការប្រកាសរបស់ក្រសួងកសិកម្ម រុក្ខប្រមាញ់ និងនេសាទ៕