អ្នកជំនាញ៖ វិស័យអចលនទ្រព្យនៅទ្រឹង​ជាឱកាសសម្រាប់អ្នក​មិនទាន់មានលំនៅឋាន

នៅក្នុងស្ថានភាពដែលទីផ្សារអចលនទ្រព្យនៅទ្រឹង ជាឱកាសល្អបំផុតសម្រាប់អ្នកវិនិយោគលើវិស័យអចលនទ្រព្យ និងអ្នកដែលមិនទាន់មានលំនៅឋានរស់នៅផ្ទាល់ខ្លួន អាចពិចារណាក្នុងការទិញនាពេលនេះ នឹងទទួលបាន​លក្ខខណ្ឌងាយ និងសមរម្យជាមួយអ្នកលក់។ នេះគឺជាការលើកឡើងរបស់អ្នកជំនាញអចលនទ្រព្យកម្ពុជា។

លោក ច្រឹក សុខនីម ប្រធាន​សមាគម​អ្នកវាយតម្លៃ និ​ងភ្នាក់ងារ​អចលនវត្ថុ បានលើកឡើងថា សម្រាប់លំនៅឋាន​ដែលទិញហើយ អាចចំណេញច្រើននាពេលខាងមុខ គឺដូចជា ផ្ទះនៅក្នុងបុរី ឬផ្ទះ Shop house សម្រាប់ប្រើប្រាស់​ជាអាជីវកម្មក្នុងរយៈពេលយូរ នឹងទទួលបានប្រាក់ចំណេញខ្ពស់។

លោកបន្តថ្លែងដូច្នេះថា «នៅពេលនេះ លក្ខខណ្ឌតម្លៃការទូទាត់មានភាពបត់បែនច្រើន ដែលនេះជាសញ្ញាមួយល្អ អាចចាប់យកឱកាសប្រសិនមានប្រាក់ក្នុងការវិនិយោគ»។

លោកបានបន្ថែមទៀតថា នៅពេលដែលស្ថានភាពវិបត្តិផ្សេងៗស្ងប់ស្ងាត់ វិស័យចលនទ្រព្យនឹងងើបឡើងវិញ តម្លៃក៏នឹងអាចស្ទុះឡើងផងដែរ ប៉ុន្តែពេលនេះ នៅទ្រឹង។

ដូចគ្នានេះដែរ លោក ឡោ វិចិត្រ ប្រធានសមាគមអចលនទ្រព្យសកល រាជធានីភ្នំពេញ បានគូសបញ្ជាក់ថា ប្រជាពលរដ្ឋ ដែលមានចំណូលសមរម្យ តែមិនទាន់មានលំនៅឋាន គួរពិចារណាទិញផ្ទះណាដែលមានតម្លៃពិសេស មានលក្ខខណ្ឌបង់ប្រាក់ងាយស្រួល នៅក្នុងកាលៈទេសៈនេះ ដែលអ្នកទិញមានប្រៀបចរចាតម្លៃជាមួយអ្នកលក់។

ចំពោះតម្លៃអចលនទ្រព្យងើបឡើងវិញ ឬបន្តធ្លាក់ចុះ គឺអាស្រ័យទៅលើកត្តាធំៗចំនួនបី៖ ទី១ គឺការហូរចូលរបស់ក្រុម​ហ៊ុនបរទេស ចូលមកវិនិយោគនៅកម្ពុជា នោះនឹងបង្កើនតម្រូវការលើវិស័យអចលនទ្រព្យកាន់តែខ្ពស់។ ទី២ ការហូរចូល​នៃភ្ញៀវទេសចរ ខណៈដែលកម្ពុជា នឹងធ្វើជាម្ចាស់ផ្ទះស៊ីហ្គេមនៅឆ្នាំ ២០២៣ និងទី៣ គឺពាក់ព័ន្ធនឹងអត្រា​ប្រាក់ចំណូល​របស់ប្រជាជន។ តើអត្រានៃការមានការងារធ្វើរបស់ប្រជាជនយើងកើនឡើងជាងមុន ឬប្រាក់ចំណូលកើនឡើងខ្ពស់ឬអត់ ដែលនេះ អាចជាសញ្ញាបញ្ជាក់បានថា វិស័យអចលនទ្រព្យកើនឡើង ធ្លាក់ចុះ ឬនៅទ្រឹង។ នេះជាការគូសបញ្ជាក់​របស់លោក ឡោ វិចិត្រ។

ចំណែកលោក ច្រឹក សុខនីម មើលឃើញថា វិស័យអចលនទ្រព្យនៅកម្ពុជា ក្នុងតំបន់អាស៊ាន និងផ្នែកខ្លះនៃពិភពលោក នៅក្នុងឆ្នាំ ២០២២-២០២៣ គឺនៅទ្រឹង ឬមានកំណើនតិចតួចបំផុត។ លោកវាយតម្លៃថា វិស័យនេះ នឹងអាចងើបឡើង​វិញខ្លាំង នៅពាក់កណ្តាលឆ្នាំ ២០២៤ ទៅឆ្នាំ ២០២៥៕