ហូជីមិញ រៀបចំទទួលភ្ញៀវទេសចរ ចិន ក្នុងទិសដៅបង្កើតប្រាក់ចំណូលជិត ៧ ពាន់លានដុល្លារ

ក្រុមហ៊ុនទេសចរណ៍នៅទីក្រុងហូជីមិញនៃប្រទេសវៀតណាមបានជំរុញឲ្យអាជ្ញាធរក្រុងត្រៀមផែនការ ក៏ដូចជារៀបចំផលិតផលក្នុងស្រុកឲ្យមានលក្ខណៈសមរម្យ និងសុវត្ថិភាពកាន់តែឆាប់កាន់តែល្អ ដើម្បីស្វាគមន៍ភ្ញៀវទេសចរចិនសាជាថ្មី ។

ទីក្រុងហូជីមិញបានកំណត់គោលដៅបម្រើភ្ញៀវទេសចរអន្តរជាតិចំនួន ៥ លាននាក់ និងភ្ញៀវទេសចរក្នុងស្រុកចំនួន ៣៥ លាននាក់នៅឆ្នាំ ២០២៣ នេះ ក្នុងទិសដៅបង្កើតប្រាក់ចំណូលចំនួន ១៦០ ពាន់ពាន់លានដុង (៦.៨ ពាន់លានដុល្លារ) ។

នៅក្នុងសន្និសីទមួយដែលបានធ្វើឡើងកាលពីថ្ងៃអង្គារ ដើម្បីពិនិត្យឡើងវិញនូវវឌ្ឍនភាពនៃវិស័យទេសចរណ៍របស់ទីក្រុងក្នុងឆ្នាំ ២០២២ និងពិភាក្សាអំពីបេសកកម្មសំខាន់ៗសម្រាប់ឆ្នាំ ២០២៣, លោក Nguyen Ngoc Tan អគ្គនាយកក្រុមហ៊ុន Saco Travel បានឲ្យដឹងថា ទេសចរណ៍របស់ទីក្រុងហូជីមិញរំពឹងថា នឹងងើបឡើងវិញយ៉ាងឆាប់រហ័ស បន្ទាប់ពីចិនបើកប្រទេសឡើងវិញ ។

ទីក្រុងហូជីមិញបានស្វាគមន៍ភ្ញៀវអន្តរជាតិជាង ៣.៤៦ លាននាក់ក្នុងឆ្នាំ ២០២២ ដែលជាការកើនឡើង ១០០ ភាគរយ បើប្រៀបធៀបនឹងឆ្នាំ ២០២១ និងសម្រេចបានគោលដៅរហូតដល់ទៅ ៩៩ ភាគរយ ។

លើសពីនេះទៀត ហូជីមិញ ក៏បានទទួលអ្នកទេសចរក្នុងស្រុកជាង ៣១ លាននាក់ផងដែរ ពោលកើនឡើង ២៣៤ ភាគរយ និងលើសពីគោលដៅចំនួន ២៤.៩ ភាគរយ ខណៈទីក្រុងនេះទទួលបានចំណូលពីវិស័យទេសចរណ៍ចំនួន ១៣១.១ ពាន់ពាន់លានដុង (៥.៦ ពាន់លានដុល្លារ) ពីមួយឆ្នាំទៅមួយឆ្នាំ ដោយកើនឡើង ១៩៦.៤ ភាគរយ ៕

ប្រែសម្រួលដោយ ៖ ជីវ័ន្ត

ប្រភព ៖ Tuoi Tre

ចុចអាន ៖ ចិន ផ្អាកផ្តល់ទិដ្ឋាការដល់ប្រទេសអាស៊ីចំនួន ២ ដែលទារលទ្ធផលតេស្តកូវីដ លើអ្នកទេសចរខ្លួន