Connect with us

ព័ត៌មានជាតិ

វិនិយោគិនហុងកុង ​គ្រោងបង្កើតរោងចក្រកាបូប​ប្រើកម្លាំងពលកម្មជាង ១ម៉ឺន២ពាន់នាក់ នៅខេត្តកំពង់ស្ពឺ

បានផុស

នៅ

វិនិយោគិនហុងកុង មានគម្រោងបង្កើតរោងចក្រកាបូ នៅខេត្តកំពង់ស្ពឺ ដែលត្រូវការកម្លាំងពលកម្មប្រមាណ ១២០០០កន្លែង។ នេះបើតាមការបញ្ជាក់របស់លោក វ៉ី សំណាង អភិបាលខេត្តកំពង់ស្ពឺ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងប្រាប់កម្ពុជាថ្មី នាថ្ងៃទី ០៧ មីនានេះ លោក វ៉ី សំណាង បានឱ្យដឹងថា តាមការពិភាក្សាជំហានដំបូងនេះ វិនិយោគិនហុងកុង នឹងបង្កើតរោងចក្រផលិតកាបូប ដែលអាចផ្តល់ការងារដល់ពលរដ្ឋនៅក្នុងតំបន់ជាង ១២០០០នាក់។​

លោកអភិបាលខេត្ត បានលើកឡើងថា ខេត្តកំពង់ស្ពឺស្វាគមន៍យ៉ាងកក់ក្តៅចំពោះអ្នកវិនិយោគទាំងអស់ ទាំងវិនិយោគិន​ជាតិ និងអន្តរជាតិ ដែលមានបំណងបង្កើតរោងចក្រគ្រប់វិស័យ ដូចជា រោងចក្រកែច្នៃផលិតផលកសិកម្ម ឧស្សាហកម្ម កសិ-ឧស្សាហកម្ម ជាដើម ពោលគឺមិនទទួលតែរោងចក្រផលិតអាភៀន និងអាវុធខុសច្បាប់ ក្រៅពីនេះទទួលទាំងអស់។

ជាក់ស្តែងលោក វ៉ី សំណាង បានឱ្យដឹងថា ស្អែកនេះ ឯកឧត្តមបណ្ឌិត ហ៊ុន ម៉ាណែត នឹងអញ្ជើញបើកសម្ពោធ​ដាក់ដំណើរការរោងកច្រសម្លៀកបំពាក់ស្បែកជើងមួយ នៅខេត្តកំពង់ស្ពឺផងដែរ។

លោក វ៉ី សំណាង បានបង្ហើបឱ្យដឹងទៀតថា នៅចុងខែនេះ ​លោកនឹងអញ្ជើញទៅទីក្រុងហុងកុង ដើម្បីធ្វើបទបង្ហាញអំពី​សក្តានុពលរបស់ខេត្តកំពង់ស្ពឺទៅដល់អ្នកវិនិយោគិន ១២០​ក្រុមហ៊ុន ដែលមានការចាប់អារម្មណ៍ចង់វិនិយោគ​គម្រោងនានា នៅខេត្តកំពង់ស្ពឺ។ លោក អភិបាលខេត្តរំពឹងថា ក្រោយជំនួបនេះ នឹងមានរោងចក្រសហគ្រាសជាច្រើន បង្កើតឡើងនៅទឹកដីខេត្តកំពង់ស្ពឺ និងផ្តល់ការងាររាប់ម៉ឺនកន្លែងបន្ថែមទៀត។ បើតាមលោក វ៉ី សំណាង គម្រោងនេះ លោកទទួលបានការអនុញ្ញាតពីសម្តេចតេជោ ហ៊ុន សែន នាយករដ្ឋម​ន្ត្រីរួចហើយ។

សូមបញ្ជាក់ថា ខេត្តកំពង់ស្ពឺ គឺជាខេត្តមានសក្តានុពល ដែលទទួលបានគម្រោងបង្កើតរោចក្រច្រើនជាងគេ នៅដើមឆ្នាំ ២០២៣នេះ៕

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម