កំណើនពីការនាំចេញកៅស៊ូកម្ពុជា សម្រេចបានថវិកាជិត ១៧០ លានដុល្លារអាមេរិក

នៅក្នុង​ត្រីមាស​ទី១ ដើមឆ្នាំ ២០២៣នេះ ការនាំចេញកៅស៊ូកម្ពុជា ទទួលបានថវិកាប្រមាណ ១៦៨លានដុល្លារ កើនឡើង ៤២,៨ភាគរយ បើធៀបនឹងរយៈពេលដូចគ្នា កាលពីឆ្នាំ ២០២២ មានត្រឹមតែ ១១៧លានដុល្លារប៉ុណ្ណោះ។ នេះបើយោងតាមទិន្នន័យពាណិជ្ជកម្មចុងក្រោយរបស់អគ្គនាយកដ្ឋានគយ និងរដ្ឋាករ។

យោងតាមទិន្នន័យដដែលនេះ បានបង្ហាញថា ការ​នាំ​ចេញ​កៅស៊ូ​របស់​កម្ពុជា ​ក្នុង​ខែ​មករា ឆ្នាំ​២០២៣ ​មាន​ការ​កើន​ឡើង ៥៩,៨​ភាគ​រយ បើ​ធៀប​នឹង​ខែ​មករា ឆ្នាំ​២០២២ ដោយ​រក​ចំណូល​បានចំនួន ៥៤​លាន​ដុល្លារ។ ចំណែក នៅក្នុងខែកុម្ភៈ នាំចេញកៅស៊ូដែលបានចុះបញ្ជីមានកំណើន ៦៧,៤ ភាគរយ រកប្រាក់ចំណូលបាន ៥៩ លានដុល្លារ។ ដោយឡែក នាំចេញកៅស៊ូក្នុងខែមីនា ឆ្នាំ ២០២៣ ទទួលបានចំណូល ៥៥ លានដុល្លារ របស់ប្រទេស កើនឡើង ១៣,១ ភាគរយបើធៀប​នឹងរយៈពេលដូចគ្នាក្នុងឆ្នាំ ២០២២ មានចំនួន ៤៨.៥ លានដុល្លារ។

កាលពីឆ្នាំ ២០២២ កម្ពុជា បានរកចំណូលពីការនាំចេញកៅស៊ូធម្មជាតិ និងផលិតផលកៅស៊ូបានប្រមាណ ៥៤១. ៦៦ លានដុល្លារ មានការកើនឡើង ២៨,៣ ភាគរយ បើធៀបនឹងឆ្នាំ ២០២១ បើទោះបីជាមានស្ថានភាពមិនល្អ រួមទាំងការធ្លាក់​ចុះនៃតម្លៃកៅស៊ូធម្មជាតិយ៉ាងណាក្តី។

សូមបញ្ជាក់ថា ទីផ្សារកៅស៊ូកម្ពុជា នាំចេញទៅប្រទេសចិន វៀតណាម ម៉ាឡេស៊ី សិង្ហបុរី ឥណ្ឌា និងសហភាពអឺរ៉ុប (EU)។

គិតត្រឹមឆ្នាំ២០២២ ផ្ទៃដីដាំកៅស៊ូ សរុបមានចំនួន ៤០៤ ០៤៤ហិកតា ក្នុងនោះ ផ្ទៃដីចៀរជ័រមានចំនួន ៣១០ ១៩៣ហិកតា ស្មើនឹង៧៧ភាគរយ និងផ្ទៃដីថែទាំមានចំនួន ៩៣ ៨៥១ហិកតា ស្មើនឹង២៣ភាគរយ៕