សេដ្ឋកិច្ច

BRICS ថា ពិភពលោកត្រូវការសេដ្ឋកិច្ចពហុប៉ូល ដើម្បីកាត់បន្ថយហានិភ័យនៃអស្ថិរភាពសេដ្ឋកិច្ច

បានផុស

២ years មុន

នៅ

ថ្ងៃសុក្រ ៧ មិថុនា ២០២៤

ដោយ

អតីតប្រធានាធិបតីប្រេស៊ីល និងបច្ចុប្បន្នជាប្រធាននៃធនាគារអភិវឌ្ឍន៍ថ្មី (NDB) របស់អង្គការប្រទេស BRICS លោកស្រី Dilma Rousseff បានថ្លែងកាលពីថ្ងៃព្រហស្បតិ៍ថា ពិភពលោកត្រូវការសេដ្ឋកិច្ចពហុប៉ូលជាចាំបាច់ដើម្បីកាត់បន្ថយហានិភ័យនៃអស្ថិរភាពសេដ្ឋកិច្ចសកល ដែលបណ្តាលមកពីបញ្ហានៅក្នុងប្រទេសដែលមានសេដ្ឋកិច្ចធំៗ។

ថ្លែងក្នុងវេទិកាសេដ្ឋកិច្ចអន្តរជាតិនៅទីក្រុងសង់ពីទ័របួរគ៍ នៃប្រទេសរុស្ស៊ី លោកស្រី Rousseff បានកត់សម្គាល់ថា ប្រព័ន្ធសេដ្ឋកិច្ចបច្ចុប្បន្ន ផ្តល់ផលប្រយោជន៍ដល់តែប្រទេសមួយចំនួនប៉ុណ្ណោះ។ នេះបើតាមការចុះផ្សាយរបស់ទីភ្នាក់ងារសារព័ត៌មានតួកគី Anadolu Agency ។

លោកស្រីថ្លែងយ៉ាងដូច្នេះថា៖ «ដោយគ្មានមន្ទិល ប្រទេសដែលតាំងខ្លួនថាជាប្រទេសអភិវឌ្ឍន៍ គ្មានសមត្ថភាពក្នុងការផ្តល់ដំណោះស្រាយចំពោះបញ្ហាជាប់លាប់ ដែលពិភពលោកកំពុងជួបប្រទះនៅពេលនេះនោះទេ»។

លោកស្រីបន្តថា៖ «ដោយសារតែបញ្ហានេះ យើងត្រូវការសេដ្ឋកិច្ចពហុប៉ូល ជាមួយនឹងមជ្ឈមណ្ឌលថ្មីៗ ដែលអាចជួយទប់ទល់នឹងការប៉ះទង្គិច និងវិបត្តិជាសកល។ វាអាចកាត់បន្ថយហានិភ័យនៃអស្ថិរភាពសេដ្ឋកិច្ចសកល ដែលបង្កឡើងដោយបញ្ហាក្នុងប្រទេសសេដ្ឋកិច្ចធំៗ»។

គួរគូសបញ្ជាក់ថា BRICS គឺជាអង្គការអន្តររដ្ឋាភិបាលមួយ ដែលរួមមានប្រទេសប្រេស៊ីល រុស្ស៊ី ឥណ្ឌា ចិន អាហ្រ្វិកខាងត្បូង អ៊ីរ៉ង់ អេហ្ស៊ីប អេត្យូពី និងអារ៉ាប់រួម។

អង្គការនេះ បានបង្កើតធនាគារអភិវឌ្ឍន៍ថ្មី (NDB) ក្នុងឆ្នាំ ២០១៥ ដើម្បីបង្កើតជម្រើសជំនួសឱ្យមូលនិធិរូបិយវត្ថុអន្តរជាតិ (IMF) និងធនាគារពិភពលោក ក៏ដូចជាគាំទ្រដល់បដិដុល្លារនីយកម្មក្នុងចំណោមប្រទេសជាសមាជិករបស់ខ្លួន៕

Related Topics:BRICS