កម្ពុជារកចំណូលបានជាង៣០០​លានដុល្លារពីការនាំចេញសំបកកង់រថយន្តក្នុងរយៈពេល៥ខែដើមឆ្នាំនេះ

កម្ពុជាបាននាំចេញផលិតផលសំបកកង់រថយន្តដែលមានទឹកប្រាក់​ជាង៣០៨​លានដុល្លារ​ក្នុងរយៈពេល៥ខែដើមឆ្នាំនេះកើនឡើងជាង២០៤ភាគរយធៀបនឹងរយៈពេលដូចគ្នាកាលពីឆ្នាំមុនដែលមានទឹកប្រាក់តែជាង១០១លានដុល្លារ​ស្របពេលដែលមន្រ្តីនិងអ្នកជំនាញអះអាងថាកំណើននេះឆ្លុះបញ្ចាំងពីការធ្វើពិពិធកម្មនៃផលិតនាំចេញរបស់កម្ពុជាទៅកាន់ទីផ្សារអន្តរជាតិ។

យោងតាមស្ថិតិ​របស់​​​អគ្គនាយកដ្ឋាន​គយ​ និង​រដ្ឋាករ​កម្ពុជា​បាន​ឲ្យ​ដឹង​ថា នៅ​ក្នុង​រយៈពេល​៥​ខែ ​នៃ​ឆ្នាំ​២០២៤​នេះ​ ការ​នាំ​ចេញ​សំបក​កង់​រថយន្ត​​​​មាន​តម្លៃ​៣០៨,៧៦លានដុល្លារកើនឡើង​ជាង​២០៧ លាន​ដុល្លារឬ២០៤ភាគរយ​ធៀប​នឹង​រយៈពេល​ដដែល​កាលពី​ឆ្នាំ​២០២៣​​ ។

លោក ប៉ែន សុវិជាតិ អ្នកនាំពាក្យស្រួងពាណិជ្ជកម្មបានថ្លែងប្រាប់កម្ពុជាថ្មីកាលពីពេលថ្មីៗនេះថា ​ការនាំចេញសំបកកង់រថយន្តគឺជាផលិតផលថ្មីមួយរបស់កម្ពុជា។ លោកថា ការណ៍នេះ​ឆ្លុះបញ្ចាំងអំពីកិច្ចខិតខំប្រឹងប្រែងរបស់រាជរដ្ឋាភិបាលក្នុងការជំរុញនិងពង្រីការនាំចេញទៅកាន់ទីផ្សារតំបន់ និងពិភពលោក។

លោកបានថ្លែងថា៖«​ការបើកទីផ្សារថ្មីសម្រាប់ផលិតផលសំបកកង់រថយន្ត​​​ គឺជាការបោះជំហានមួយរបស់យើងក្នុងការពង្រីកការនាំចេញ ខណៈដែរឧស្សាហកម្មផលិតសំបកកង់រថយន្តគឺជាឧស្សាហកម្មថ្មីមួយរបស់ប្រទេសកម្ពុជាយើង»។

លោក ម៉ែន សុភ័ក្រ ប្រធាន​សមាគម​អភិវឌ្ឍន៍​កៅស៊ូ​កម្ពុជា និងជា​​នាយក​ក្រុមហ៊ុននាំចេញ​កៅស៊ូ Sopheak Nika Investment Agro-Industrial Plants Co., Ltd ​មានប្រសាសន៍​កន្លងមកថាជាមួយការចាប់ផ្ដើម​ដំ​ណើ​រការ​ឡើងវិញ​នៃ​រោងចក្រ​ផលិត​សម្បក​កង់​រថយន្ត​នៅ​ខេត្ត​ព្រះសីហនុ ខេត្តក្រចេះ និង​ស្វាយរៀង នឹង​ជួយ​ស្រូបយក​ជ័រកៅស៊ូ​ក្នុងស្រុក​នាពេល​អនាគត​។​​

លោកសុភ័ក្រ បានឱ្យដឹងថា វត្តមាន​រោងចក្រ​ផលិត​សម្បក​កង់​ដែលមាន​ស្រាប់​នៅ​កម្ពុជា​នឹង​ជួយ​ដល់​ឧស្សាហ​​កម្ម​កៅស៊ូ​នៅ​កម្ពុជា​។​

​លោក​លើកឡើងថា​៖«​ខ្ញុំ​បាន​ជួប​ជាមួយ​ថ្នាក់ដឹកនាំ​រោងចក្រ​ផលិត​សម្បក​កង់​រថយន្ត​នោះ ដើម្បី​ស្វែងយល់​ពី​លក្ខណៈ ឬ​ស្តង់ដា​នៃ​ជ័រកៅស៊ូ​ដែល​យើង​អាច​ផ្គត់ផ្គង់​បាន​។ យោងតាម​តម្រូវការ​របស់​រោងចក្រ​ទាំងនោះ​យើង​អាច​ផលិត​ជ័រកៅស៊ូ​បាន​តាម​តម្រូវការ​ពួកគេ​»​។

លោក​បន្ថែមថា នៅពេលដែល​ជ័រកៅស៊ូ​ក្នុងស្រុក​អាច​ផ្គត់ផ្គង់​បាន វា​នឹង​ជួយ​រក្សា​ស្ថិរភាព​តម្លៃ និង​កាត់បន្ថយ​ពេលវេលា​ដឹកជញ្ជូន និង​ថ្លៃដើម​ការដឹក​ជញ្ជូន​ទៅ​លក់​នៅក្រៅ​ប្រទេស​ផងដែរ​។​

​​បច្ចុប្បន្ន​នេះ នៅ​កម្ពុជាមាន​រោង​ចក្រ​ផលិត​សំបក​កង់​រថយន្ដ​ចំនួន ៣ កំពុងដំណើការផលិតដូចជា ​ក្រុមហ៊ុន General Tires Technology (Cambodia) Co., Ltd ដែល​មានទីតាំង​​នៅក្នុង​តំបន់​សេដ្ឋកិច្ច​ពិសេស​ក្រុង​ព្រះសីហនុ​។​ ​​ ក្រុមហ៊ុន Sailun Group Co Ltd ប្រតិបត្តិការ​តាមរយៈ​ក្រុមហ៊ុន​បុត្រ​សម្ព័ន្ធ​របស់ខ្លួន​គឺ​ក្រុមហ៊ុន Cart Tire Co Ltd ដែលមាន​ទីតាំងនៅ​តំបន់​សេដ្ឋកិច្ច​ពិសេស Qi Lu (Cambodia) ក្រុង​បាវិត នៃខេត្តស្វាយរៀង​ និងក្រុមហ៊ុន​ផលិត​សំបក​កង់​ធំ​ទី​បី​គឺ Qingdao Doublestar Group មានទីតាំង​នៅ​ខេត្តក្រចេះ ដោយ​សហការ​ជាមួយ​ក្រុមហ៊ុន UBE Development Co Ltd ខណៈដែលរោងចក្រផលិតសំបកកង់រថយន្តមួយចំនួនទៀតកំពុងសាងសង់៕​