លោក ឃឹម ហ្វីណង់៖ សហគមន៍កសិកម្មទំនើបផ្តល់​ទុន​កម្ចីអាជីវកម្ម ដល់សមាជិកមិនតម្រូវឱ្យមានទ្រព្យបញ្ចាំ

លោក ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួង កសិកម្ម រុក្ខាប្រមាញ់ និងនេសាទ នៅព្រឹកថ្ងៃទី ២៤ ខែតុលា ឆ្នាំ ២០២៤ បានជួបពិភាក្សាការងារជាមួយអ្នកផ្តល់កម្ចីការការប្រាក់ទាប និងអ្នកធានាឥណទាន នៅទីស្ដីការក្រសួងកសិកម្ម។

មន្ត្រីអ្នកនាំពាក្យរូបនេះ បានឱ្យដឹងថា សហគមន៍កសិកម្មទំនើបផ្តល់ទុនកម្ចីអាជីវកម្មដល់សមាជិករបស់ខ្លួនដោយមិនចាំបាច់តម្រូវឱ្យមានវត្ថុបញ្ចាំ តែធ្វើដូច្នេះបានលុះត្រាតែមានអ្នកហ៊ានឱ្យខ្ចី និងមានអ្នកធានាជាមុនសិនទើបអាចទៅរួច។

បើតាមលោក ឃឹម ហ្វីណង់ ធនាគារ ARDB បានផ្តល់កម្ចីការប្រាក់ទាបជូនដល់សហគមន៍កសិកម្មទំនើបមួយចំនួនរួចមកហើយ ចំណែកឯសាជីវកម្មធានាឥណទានកម្ពុជា (CGCC)ក៏បានចុះអនុស្សរណៈយោគយល់គ្នា(MoU)ជាមួយសហគមន៍កសិកម្មទំនើបដើម្បីផ្តល់សេវាធានាឥណទានដល់សហគមន៍រួចរាល់ហើយដែរ។

ក្រុមការងារបានឯកភាពគ្នានឹងរៀបចំនីតិវិធីលម្អិត ដើម្បីចាប់ផ្តើមអនុវត្តយន្តការសហការថ្មីនេះនាពេលខាងមុខ ដែលនឹង​បើកផ្លូវឱ្យសហគមន៍កសិកម្មទំនើបអាចមានលទ្ធភាពដំណើរការប្រតិបត្តិការរបស់ខ្លួន ដោយមិនចាំបាច់ឱ្យសមាជិកនីមួយៗ​ជាប់បំណុលធនាគារឡើយ។

កាលពីពេលថ្មីៗនេះ លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា សហគមន៍កសិកម្មទំនើបដើរតួនាទីសំខាន់ និងជាខែលក្នុងការជួយប្រជាកសិករដែលខ្វះបច្ចេកទេស ប្រឈមនឹងបំរែបំរួលអាកាសធាតុ ខ្វះឥណទាន និងប្រឈមហានិភ័យទីផ្សារ។

ប្រជាកសិករដែលស្ម័គ្រចិត្តចូលរួមជាសមាជិកសហគមន៍កសិកម្មទំនើប នឹងទទួលបាននូវការវិនិយោគ និងទុនគ្រប់គ្រាន់ សម្រាប់កសិផលសក្តានុពល ដូចជា ​ស្រូវអង្ករ ដំឡូងមី និងស្វាយចន្ទីជាដើម៕

អត្ថបទ៖ ឡេង ដេត