ព័ត៌មានអន្ដរជាតិ

តម្លៃមាសអន្តរជាតិ ឡើង ១ ភាគរយ ក្រោយធ្លាក់ចុះជាគំហុកកាលពីសប្ដាហ៍មុន

បានផុស

២ years មុន

នៅ

ថ្ងៃចន្ទ ១៨ វិច្ឆិកា ២០២៤

ដោយ

តម្លៃមាសជួញដូរនៅលើទីផ្សារអន្តរជាតិ បានកើនឡើង ១ ភាគរយ សម្រាប់ការជួញដូរនៅថ្ងៃចន្ទនេះ ក្រោយធ្លាក់ចុះជាគំហុកកាលពីសប្ដាហ៍មុន ដោយសារតែប្រាក់ដុល្លារឡើងថ្លៃ ក្រោយលោក ដូណាល់ ត្រាំ ឈ្នះការបោះឆ្នោតប្រធានាធិបតីអាមេរិក។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មាសដុំសម្រាប់ការជួញដូរភ្លាមៗលើទីផ្សារហាងឆេង បានឡើងថ្លៃ ១ ភាគរយ ដោយជួញដូរនៅតម្លៃ ២ ៥៨៧,៤៩ ដុល្លារ/អោន បន្ទាប់ពីធ្លាក់ចុះប្រហែល ៤ ភាគរយ កាលពីសប្ដាហ៍មុន ដែលជាអត្រាធ្លាក់ចុះប្រចាំសប្ដាហ៍ធំបំផុតក្នុងរយៈពេលជាង ៣ ឆ្នាំ។ ចំណែកមាសនាពេលអនាគតរបស់អាមេរិកវិញ បានកើនឡើង ០,៩ ភាគរយ ដោយជួញដូរក្នុងតម្លៃ ២ ៥៩២ ដុល្លារ/អោន។

ការឡើងថ្លៃមកវិញនៃតម្លៃមាស កើតឡើងនៅពេលការឡើងថ្លៃលុយដុល្លារហាក់ថមថយ ខណៈវិនិយោគិនរង់ចាំការបកស្រាយពីមន្ត្រីធនាគារកណ្តាលនៅសប្តាហ៍នេះ សម្រាប់តម្រុយបន្ថែមទៀតអំពីគោលនយោបាយអត្រាការប្រាក់របស់សហរដ្ឋអាមេរិក។

ការកាត់បន្ថយអត្រាការប្រាក់ ជាធម្មតាអាចធ្វើឱ្យតម្លៃលុយដុល្លារធ្លាក់ចុះ ដែលអាចធ្វើឱ្យតម្លៃមាសកើនឡើងវិញ។ ឥឡូវនេះ តម្លៃប្រាក់ដុល្លារមានលំនឹង បន្ទាប់ពីកើនឡើង ១,៦ ភាគរយ កាលពីសប្តាហ៍មុន ដែលជំរុញដោយលទ្ធផលបោះឆ្នោតនៅ សហរដ្ឋអាមេរិក៕