ព័ត៌មានអន្ដរជាតិ

មេដឹកនាំឥណ្ឌូណេស៊ី ជឿថាប្រទេសខ្លួននឹងឈប់នាំចូលអង្ករនៅឆ្នាំក្រោយ

បានផុស

៦ ខែ មុន

នៅ

ថ្ងៃពុធ ៤ ធ្នូ ២០២៤

ដោយ

ប្រធានាធិបតីឥណ្ឌូណេស៊ី លោក ប្រាបូវូ ស៊ូប៊ីយ៉ានតូ បានសម្តែងនូវសុទិដ្ឋិនិយមអំពីការបញ្ឈប់ការនាំចូលអង្ករនៅឆ្នាំ ២០២៥ ដោយលើកឡើងពីកំណើននៃផលិតកម្មស្បៀងជាតិ នៅឆ្នាំនេះ។ នេះបើតាមការចុះផ្សាយរបស់ទីភ្នាក់ងារសារ ព័ត៌មានរដ្ឋ Antara។

លោកថ្លែងក្នុងអំឡុងកិច្ចប្រជុំពេញអង្គគណៈរដ្ឋមន្ត្រីនៅវិមានប្រធានាធិបតីកាលពីថ្ងៃចន្ទថា៖ «ខ្ញុំមានទំនុកចិត្តថា នៅឆ្នាំ ២០២៥ យើងនឹងលែងនាំចូលអង្ករទៀតហើយ»។

ជាមួយគ្នានោះ លោកបានបង្ហាញបំណងប្រាថ្នារបស់ខ្លួនចង់ឱ្យឥណ្ឌូណេស៊ីបញ្ចប់ការនាំចូលទំនិញស្បៀងគ្រប់ប្រភេទទាំងអស់ ដោយថ្លែងយ៉ាងដូច្នេះថា៖ «នៅពេលអនាគត យើងនឹងកាន់តែរឹងមាំនៅក្នុងវិស័យម្ហូបអាហារនេះ។ យើងនឹងមិនត្រឹមតែបញ្ឈប់ការនាំចូលអង្ករប៉ុណ្ណោះទេ ប៉ុន្តែក៏បញ្ឈប់ការនាំចូលទំនិញស្បៀងទាំងអស់ផងដែរ»។

លោក ប្រាបូវូ បានបន្តថា៖ «ផលិតកម្មស្បៀងរបស់យើងបានកើនឡើង ហើយទុនបម្រុងស្បៀងរបស់យើងប្រហែលជាមានកម្រិតខ្ពស់បំផុតក្នុងរយៈពេលជាច្រើនឆ្នាំ។ បច្ចុប្បន្ន យើងមានស្បៀងអាហារប្រហែល ២ លានតោន ក្នុងស្តុក»។

គួរគូសបញ្ជាក់ថា កន្លងមកលោក ប្រាបូវូ បានបញ្ជាឱ្យក្រសួងកសិកម្មបង្កើនផ្ទៃដីស្រែថ្មីរហូតដល់ប្រមាណ ៣ លាន ហិចតា ដើម្បីធានាសន្តិសុខស្បៀង ចំពេលដែលតម្រូវការកើនឡើងខ្ពស់ ធៀបនឹងផលិតកម្មចុះខ្សោយ។

ការបង្ហាញសុទិដ្ឋិនិយមរបស់លោក ប្រាបូវូ ធ្វើឡើងចំពេលដែលការនាំចូលអង្កររបស់ឥណ្ឌូណេស៊ីបានហក់ឡើងក្នុងរយៈពេល២ឆ្នាំកន្លងមកនេះ ដោយបានកើនដល់ជាង ៣ លានតោនក្នុងមួយឆ្នាំ។ ក្នុងឆ្នាំ ២០២៣ ប្រទេសនេះនាំចូលអង្ករជាង ៣,៥ លានតោន៕