ផលិតផលសំណង់ជាង ៥០០ មុខ ចូលរួមដាក់បង្ហាញពិព័រណ៍ឧស្សាហកម្មសំណង់កម្ពុជា

ក្រុមហ៊ុនក្នុងវិស័យសំណង់ចំនួន ១១២ បានចូលរួមដាក់តាំងបង្ហាញផលិតផលក្នុង ពិព័រណ៍ឧស្សាហកម្មសំណង់កម្ពុជា-អន្តរជាតិ ដែលបានរៀបចំឡើងរយៈពេល ៣ ថ្ងៃ ចាប់ពីថ្ងៃទី៥-៧ ខែធ្នូ ឆ្នាំ ២០២៤ នៅមជ្ឈមណ្ឌលពិព័រ​ណ៍​កោះពេជ្រ។

​លោកអ្នកឧកញ៉ា ពុង ឃាវសែ ប្រធានសមាគមអ្នកសាងសង់កម្ពុជា មានប្រសាសន៍ថា ឆ្នាំនេះ ជាឆ្នាំទី ១៤ ដែលសមាគមអ្នកសាងសង់កម្ពុជា បានរៀបចំសន្និបាតបូកសរុបការងារប្រចាំឆ្នាំ និងជាលើកទី ១២ នៃការរៀបចំពិព័រណ៍ ឧស្សា ហកម្មសំណង់កម្ពុជា-អន្តរជាតិ។

គោលបំណង នៃការរៀបចំពិព័រណ៍នេះ គឺដើម្បីផ្ដល់ឱកាសឱ្យក្រុមហ៊ុនទាំងក្នុងប្រទេស និងក្រៅប្រទេស ដែលជាម្ចាស់រោងចក្រ ឬជាអ្នកនាំចូលសម្ភារបរិក្ខា និងគ្រឿងចក្រសំណង់ អាចចូលរួមដាក់​តាំងបង្ហាញ​ផលិតផលរបស់ខ្លួនរៀងរាល់ឆ្នាំ និងអាចធ្វើការផ្គត់ផ្គង់ទៅតាមតម្រូវការ​ទីផ្សារខាង​វិស័យសំណង់នៅកម្ពុជា ជាពិសេសបង្កើតវេទិការឱ្យអ្នកទិញ និងអ្នកលក់ជួបគ្នា ស្វែងយល់​ដោយ​ផ្ទាល់ និងជំរុញឱ្យមានការសហការគ្នាជាដៃគូ ដើម្បីទទួលបានតម្លៃ និងលក្ខខណ្ឌពិសេសៗ ពីដៃ​គូ​អាជីវកម្ម។

​ពិធីសម្ពោធបើកការតាំងពិព័ណ៍ឧស្សាហកម្ម សំណង់កម្ពុជា-អន្តរជាតិឆ្នាំនេះ រៀបចំធ្វើឡើង​នៅមជ្ឈមណ្ឌល​ពិព័ណ៍កោះពេជ្រ ​ក្រោមវត្តមាន លោកឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ដែលមានក្រុមហ៊ុនចូលរួមចំនួន ១១២ ក្រុមហ៊ុន ដែលមាន ២៣៧ ស្ដង់ និងសម្ភារៈ​បរិក្ខា ឧបករគ្រឿង​ចក្រសំណង់ផលិតនៅក្នុងស្រុក និងនាំចូលពីបណ្ដាប្រទេសជាច្រើន​ប្រមាណ​ជាង ៥០០ មុខ៕​