ព័ត៌មានអន្ដរជាតិ

វៀតណាមព្រួយបារម្ភពីកំណើនការនាំចេញអង្ករ ពេលមានការប្រកួតប្រជែងពីឥណ្ឌាកាន់តែខ្លាំង

បានផុស

២ years មុន

នៅ

ថ្ងៃសុក្រ ១៧ មករា ២០២៥

ដោយ

ក្រុមអ្នកជំនាញវៀតណាមបានសម្ដែងការព្រួយបារម្ភអំពីឧបសគ្គក្នុងការជំរុញកំណើនការនាំចេញអង្ករនៅឆ្នាំ ២០២៥ នេះ ជាពិសេសក្នុងបរិបទដែលឥណ្ឌាដកបំរាមលើការនាំចេញអង្កររបស់ខ្លួន ដែលធ្វើឱ្យការប្រកួតប្រជែងកាន់តែខ្លាំង។ នេះបើតាមការចុះផ្សាយរបស់កាសែត Viet Nam News។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងឆ្នាំ ២០២៤ វៀតណាមបាននាំចេញអង្ករជាង ៩ លានតោន ដោយរកចំណូលបាន ៥,៧៥ ប៊ីលានដុល្លារ។ នេះបង្ហាញពីកំណើន ១៣ ភាគរយ បើគិតពីបរិមាណ និង ២៣ ភាគរយ បើគិតពីចំណូល។ ចំណូលកើនឡើងខ្ពស់ បណ្ដាលមកពីការហក់ឡើងនៃតម្លៃអង្ករនាំចេញ ប្រហែល ១០ ភាគរយ ធៀបនឹងឆ្នាំមុន។

តួលេខបង្ហាញថា នេះគឺជាឆ្នាំទី៦ជាប់ៗគ្នាហើយ ដែលវៀតណាមបានកត់ត្រាពីកំណើននៃការនាំចេញអង្ករ ប៉ុន្តែឆ្នាំ ២០២៥ អាចនឹងពិបាកក្នុងការបន្តសម្រេចបានកំណើន។

អ្នកជំនាញវៀតណាមបានលើកឡើងថា ឱកាសលើកំណើននាំចេញអង្កររបស់វៀតណាមនៅឆ្នាំ ២០២៥ គឺអាចមានតិចតួច ដោយសារតែកម្រិតនៃការនាំចេញបានហក់ដល់កម្រិតខ្ពស់បំផុតក្នុងឆ្នាំ ២០២៤ រួចហើយ។ ជាមួយគ្នានោះ ទីផ្សារពិភពលោកនៅតែមានកត្តាមិនអំណោយផលជាច្រើន ជាពិសេសក្នុងបរិបទដែលឥណ្ឌាដកការរឹតបន្តឹងលើការនាំចេញអង្កររបស់ខ្លួន។

អ្នកជំនាញលើកឡើងថា ក្នុងរយៈពេល២ឆ្នាំចុងក្រោយនេះ ស្ដុកអង្ករឥណ្ឌាមានច្រើនដោយសារតែការរឹតបន្តឹងការនាំចេញ។ ដូច្នេះ ការវិធានការនេះ នឹងដាក់សម្ពាធលើប្រទេសនាំចេញផ្សេងទៀត រួមទាំងវៀតណាមផងដែរ ខណៈការប្រកួតប្រជែងដោយជម្រើសផ្គត់ផ្គង់ច្រើន ធ្វើឱ្យតម្លៃអង្ករធ្លាក់ចុះ។

កត្តាគួរឱ្យព្រួយបារម្ភមួយទៀតនោះគឺថា មុនដល់រដូវប្រមូលផលស្រូវចុងក្រោយ អង្ករវៀតណាមត្រូវបានលក់ក្នុងតម្លៃខ្ពស់គួរសម ដែលធ្វើឱ្យប្រទេសនាំចូលអង្ករងាកទៅរកប្រភពផ្គត់ផ្គង់ផ្សេងៗទៀត ក្នុងបរិបទដែលឥណ្ឌូណេស៊ីបញ្ឈប់ការនាំចូលអង្ករនៅឆ្នាំនេះ ដែលជះឥទ្ធិពលសំខាន់ដល់តម្លៃអង្ករ។

នៅឆ្នាំ ២០២៥ តម្លៃអង្ករវៀតណាមអាចទាបជាងឆ្នាំ ២០២៣-២០២៤ ដោយអ្នកជំនាញលើកឡើងថា នៅចុងឆ្នាំ ២០២៤ ប្រទេសដាំស្រូវធំៗជាច្រើនបានចូលដល់រដូវច្រូតកាត់ រួមទាំងវៀតណាម ដែលបណ្តាលឱ្យតម្លៃអង្ករវៀតណាមធ្លាក់ចុះយ៉ាងឆាប់រហ័ស៕