ព័ត៌មានអន្ដរជាតិ

តម្លៃមាសអន្តរជាតិកើនឡើង ដោយ ត្រាំ មិនសូវគឃ្លើនចំពោះគោលនយោបាយពន្ធ ពេលស្បថចូលកាន់តំណែង

បានផុស

១ year មុន

នៅ

ថ្ងៃអង្គារ ២១ មករា ២០២៥

ដោយ

តម្លៃមាសអន្តរជាតិបានកើនឡើងសម្រាប់ការជួញដូរនៅលើទីផ្សារអាស៊ីនាព្រឹកថ្ងៃអង្គារនេះ ដោយសារតែលោកប្រធានាធិបតីអាមេរិក ដូណាល់ ត្រាំ មិនសូវបង្ហាញពីភាពគឃ្លើនចំពោះគោលនយោបាយពន្ធគយលើទំនិញបរទេស ពេលស្បថចូលកាន់តំណែងកាលពីថ្ងៃចន្ទ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តម្លៃមាសជួញដូរដោយផ្ទាល់ បានកើនឡើងប្រមាណ ០,៦ ភាគរយ ដោយជួញដូរនៅតម្លៃ ២ ៧២៤,៧៤ ដុល្លារ/អោន ខណៈតម្លៃមាសអាមេរិកសម្រាប់កុងត្រានាពេលអនាគត បានធ្លាក់ចុះ ០,២ ភាគរយ ដោយជួញដូរនៅ ២ ៧៤២,៥ ដុល្លារ/អោន។

តម្លៃមាសកើនឡើង ខណៈប្រាក់ដុល្លារធ្លាក់ចុះ ១ ភាគរយ កាលពីថ្ងៃចន្ទ ពេលលោក ត្រាំ មិនផ្ដោតខ្លាំងលើវិធានការពន្ធគយ ដែលខុសពីការរំពឹងទុករបស់ពាណិជ្ជករដែលថា លោក ត្រាំ អាចនឹងចុះហត្ថលេខាលើអធិបញ្ជាលើគោលនយោបាយពាណិជ្ជកម្មបែបគឃ្លើនរបស់ខ្លួនពេលឡើងកាន់អំណាចភ្លាមៗ។

ជាធម្មតា គោលនយោបាយគឃ្លើន អាចនឹងបង្កើនសម្ពាធអតិផរណា ដែលធ្វើឱ្យធនាគារកណ្ដាលអាមេរិកត្រូវដំឡើងអត្រាការប្រាក់ ហើយធ្វើឱ្យប្រាក់ដុល្លារឡើងថ្លៃ។ ការធ្លាក់ចុះនៃប្រាក់ដុល្លារ រួមចំណែកដល់ការឡើងនៃតម្លៃមាស។

ពាក់ព័ន្ធនឹងកំណើនតម្លៃមាសនាថ្ងៃអង្គារនេះ អ្នកជំនាញបានលើកឡើងថា មានការធូរស្រាលនៅក្នុងទីផ្សារដោយដឹងថា ពន្ធគយមិនមែនជាអាទិភាពកំពូលនៅពេលនេះទេ ដែលវាកាត់បន្ថយការព្រួយបារម្ភអំពីភាពតានតឹងពាណិជ្ជកម្ម៕