តម្លៃប្រេង​កើនឡើង ជុំវិញ​កង្វល់ផ្គង់ផ្គង់ដោយសារពន្ធរបស់​​ ត្រាំ

តម្លៃប្រេង​អន្តរជាតិ​​បាន​កើន​ឡើង​សម្រាប់​ការជួញដូរនាថ្ងៃចន្ទនេះ​ ជុំវិញ​កង្វក់នៃការផ្គត់ផ្គង់ដែល​បណ្ដាល​មក​ពី​ការដាក់ពន្ធ​របស់​សហរដ្ឋ​អាមេរិក​លើ​កាណាដា ម៉ិកស៊ិក និងចិន​ ប៉ុន្តែកំណើន​តម្លៃនៅមាន​កម្រិតដោយសារតែកម្សោយ​តម្រូវការ។ នេះបើតាម​ការចុះ​ផ្សាយ​របស់ទីភ្នាក់ងារសារព័ត៌មាន​រ៉យទ័រ​។

ប្រេង​ឆៅ​នាពេល​អនាគត​អាមេរិក ម៉ាក​ West Texas Intermediate (WTI) ត្រូវបាន​ជួញដូរ​នៅតម្លៃ ៧៣,៨៩ ដុល្លារ/បារ៉ែល ដោយ​កើន​ឡើង​ ១,៣៦ ដុល្លារ ឬ ១,៨៨ ភាគរយ​ គិតត្រឹម​ម៉ោងជិត ២ រសៀល (ម៉ោងនៅសិង្ហបុរី) ថ្ងៃចន្ទ​នេះ​។ តម្លៃ​ប្រេង​ដដែល​ បាន​ហក់ឡើង​រហូតដល់​ ៧៥,១៨ ដុល្លារ/បារ៉ែល ​នៅ​វគ្គជួញដូរ​មុននោះ លើទីផ្សារអាស៊ី​។ ​

ចំណែក​ឯ​ប្រេងឆៅនាពេលអនាគត​ ម៉ាក​ Brent វិញ បានកើនឡើង ៧៣ សេន ឬ ០,៩៦ ភាគរយ ដោយ​ជួញដូរ​ ៧៦,៤០ ដុល្លារ/បារ៉ែល បន្ទាប់ពីឡើងដល់​ ៧៧,៣៤ ដុល្លារ/បារ៉ែល​។

ការហក់ឡើងនៃ​តម្លៃប្រេងនេះ​ បណ្ដាល​មក​ពី​វិធានការពន្ធរបស់​ប្រធានាធិបតីសហរដ្ឋ​អាមេរិក លោក ដូណាល់ ត្រាំ ប្រមាណ​ ២៥ ភាគរយ លើទំនិញ​ម៉ិកស៊ិក និងកាណាដា និង​ ១០ ភាគរយ លើ​ប្រេងឆៅកាណាដា និងទំនិញ​ចិន​។ ទាំង​កាណាដា និងម៉ិកស៊ិក សុទ្ធសឹង​តែ​ជា​ប្រទេស​ផ្គត់ផ្គង់ប្រេង​សំខាន់​ៗ​សម្រាប់​សហរដ្ឋអាមេរិក​។

ជាមធ្យម សហរដ្ឋអាមេរិកនាំចូល​ប្រេង​ ៣,៨ លាន​បារ៉ែល/ថ្ងៃ ពីកាណាដា និង ៤,៥ សែនបារ៉ែល/ថ្ងៃ​ ពីម៉ិកស៊ិក។ នេះបើតាម​យោង​តាម​ទិន្នន័យពីរដ្ឋបាលព័ត៌មានថាមពលសហរដ្ឋអាមេរិក (EIA) និងក្រុមហ៊ុនស្រាវជ្រាវទិន្នន័យ​ Kpler។

អ្នកជំនាញលើកឡើងថា ​ពន្ធលើការនាំចូលថាមពលពីកាណាដាអាចរំខានដល់ទីផ្សារថាមពលក្នុងស្រុកជាងការនាំចូលពីម៉ិកស៊ិក ហើយថែមទាំងអាចប៉ះពាល់ដល់គោលដៅរបស់​លោក ត្រាំ ក្នុងការបញ្ចុះថ្លៃថាមពលផងដែរ។ ប្រភពឧស្សាហកម្មបាននិយាយថា ពន្ធនឹងបង្កើនថ្លៃដើមសម្រាប់ក្រុមហ៊ុន​ចម្រាញ់ប្រេងរបស់សហរដ្ឋអាមេរិក​ ដោយកាត់បន្ថយប្រាក់ចំណេញរបស់ពួកគេ និងអាចបង្ខំឱ្យកាត់បន្ថយផលិតកម្ម។

ទោះជាយ៉ាងណាក៏ដោយ អ្នកជំនាញ​បានបន្ថែមថា តម្លៃប្រេងអាចនឹងធ្លាក់ចុះ​ក្រោយ​ត្រីមាស​ទី ២ ដោយសារវិធានការ​ពន្ធធ្វើ​ឱ្យ​តម្រូវការចុះ​ខ្សោយ​ ​ចំពេល​ដែល​ ត្រាំ ទាមទារ​ឱ្យ​អង្គការ​នៃ​ប្រទេស​នាំចេញប្រេង​កាត និងសម្ព័ន្ធមិត្ត (OPEC+) តម្លើង​ផលិតកម្មប្រេង​ជាថ្មី៕

​