ព័ត៌មានអន្ដរជាតិ

វៀតណាម កូរ៉េខាងត្បូង គ្រោងជំរុញសហប្រតិបត្តិការថាមពលនុយក្លេអ៊ែរ

បានផុស

២ ខែ មុន

នៅ

ថ្ងៃពុធ ២៦ កុម្ភៈ ២០២៥

ដោយ

វៀតណាម និងកូរ៉េខាងត្បូងនឹងជំរុញកិច្ចសហប្រតិបត្តិការថាមពលនុយក្លេអ៊ែរ ដោយចាប់ផ្តើមឡើងវិញនូវ «បណ្តាញសន្ទនាឧស្សាហកម្មនុយក្លេអ៊ែរកម្រិតអគ្គនាយកទ្វេភាគី»។ នេះបើតាមការចុះផ្សាយរបស់កាសែត The Investor កាលពីថ្ងៃអង្គារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការជំរុញនេះត្រូវបានស្នើឡើងនៅពេលគណៈប្រតិភូនៃក្រសួងពាណិជ្ជកម្ម ឧស្សាហកម្ម និងថាមពលកូរ៉េខាងត្បូង របស់លោករដ្ឋមន្ត្រី Dukgeun Ahn បានជួបប្រជុំគ្នានៅក្រុងសេអ៊ូល ជាមួយគណៈប្រតិភូក្រសួងឧស្សាហកម្ម និងពាណិជ្ជកម្មវៀតណាម របស់លោករដ្ឋមន្ត្រី Nguyen Hong Dien ។

ក្រសួងពាណិជ្ជកម្មកូរ៉េខាងត្បូងបានគូសបញ្ជាក់ថា ជំនួបនេះធ្វើឡើងក្នុងដំណើរទស្សនកិច្ចរបស់លោកDien ទៅកាន់កូរ៉េខាងត្បូង ដើម្បីពិភាក្សាអំពីកិច្ចសហប្រតិបត្តិការថាមពលនុយក្លេអ៊ែរ ចំពេលដែលថ្មីៗនេះ វៀតណាមកំពុងរៀបចំដើម្បីបន្តការអភិវឌ្ឍថាមពលនុយក្លេអ៊ែររបស់ខ្លួនឡើងវិញ។

គួរគូសបញ្ជាក់ថា នៅខែវិច្ឆិកា ឆ្នាំ ២០២៤ វៀតណាមបានអនុម័តបន្តគម្រោងថាមពលនុយក្លេអ៊ែរនៅខេត្ត Ninh Thuan ដែលមានសមត្ថភាពផលិតអគ្គិសនីប្រមាណ ៤ ០០០ មេហ្គាវ៉ាត់ បន្ទាប់ពីការផ្អាករយៈពេល ៨ ឆ្នាំ។

ក្រសួងឧស្សាហកម្ម និងពាណិជ្ជកម្មវៀតណាម បាននិយាយនៅក្នុងសេចក្តីព្រាងវិសោធនកម្មផែនការអភិវឌ្ឍន៍ថាមពល VIII (PDP VIII) ថា រោងចក្រថាមពលនុយក្លេអ៊ែរដំបូងរបស់វៀតណាម Ninh Thuan 1 អាចដំណើរការបានចាប់ពីឆ្នាំ ២០៣៥ យ៉ាងលឿនបំផុត។

ក្រៅតែពីកូរ៉េ មានប្រទេសជាច្រើនទៀតបានបង្ហាញពីឆន្ទៈក្នុងកិច្ចសហប្រតិបត្តិការជាមួយវៀតណាមលើវិស័យថាមពលនុយក្លេអ៊ែរ ដូចជារុស្ស៊ី ជប៉ុន និងបារាំងជាដើម៕