ព័ត៌មានជាតិ

កសិករឃុំព្រែកអាជី សម្រុកដាំឈូក បង្កើនប្រាក់ចំណូលដល់គ្រួសារ

បានផុស

១ year មុន

នៅ

ថ្ងៃអង្គារ ២២ មេសា ២០២៥

ដោយ

កសិករចំនួន ៦ ភូមិ ក្នុងឃុំព្រែកអាជី ស្រុកក្រូចឆ្មារ ខេត្តត្បូងឃ្មុំ បានងាកមកដាំឈូកយកគ្រាប់លក់វិញម្ដង លើផ្ទៃដីជិត ៦០០ ហិតា ដើម្បីបង្កើនប្រាក់ចំណូលដល់គ្រួសារ។ ការដាំឈូកយកគ្រាប់លក់នេះ កសិករ ក៏កំពុងមមាញឹកសប្បាយរីករាយក្នុងការប្រមូលផលយ៉ាងក្រៃលែងផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឈូកប្រើរយៈពេលតែ ៣ ខែ ដោយកសិករអាចប្រមូលផលបាន ហើយបេះផ្លែវារហូតដល់ពី ៣ ទៅ ៤ ខែ ឯណោះ។ ឆ្នាំនេះ ឈូកឲ្យផលដូចឆ្នាំទៅដែរ តម្លៃល្អជាងឆ្នាំទៅ ខណៈឆ្នាំទៅ តម្លៃ ១ គីឡូក្រាម គ្រាប់តែ ៤ ពាន់រៀលទេ តែនៅឆ្នាំ ២០២៥ នេះ ឈូក ១ គីឡូក្រាម លក់តម្លៃ ៦ ពាន់រៀល ហើយមានម៉ូយចុះទិញដល់ផ្ទះតែម្ដង។

លោក សាយ ចិត្រា អាយុ ៣១ ឆ្នាំ ជាកសិកររស់នៅភូមិទី ៣ ឃុំ-ស្រុក ខាងលើ បានបញ្ជាក់ទាំងទឹកមុខញញឹមថា គាត់បានដាំឈូក ៣ ឆ្នាំ មកហើយ លើផ្ទៃដីជាង ៣ ហិតា ឈូកឲ្យផលបានប្រមាណ ២ តោនដែរ។ ដើមដៃលក់បាន ១ គីឡូក្រាម តម្លៃជាង ៨ ពាន់រៀល នៅចុងខែ ៤ នេះ ឈូក ១ គីឡូក្រាម លក់បានតម្លៃតែ ៦ ពាន់រៀល។ ផាត់សោហ៊ុយ ពលកម្មកម្មករ ថ្លៃជី សាំង ចំណេញគ្រាន់បើដែរ គិតទៅល្អជាងការដាំស្រូវ។

លោក សាយ ចិត្រា បន្តថា កសិករក្នុងភូមិដាំឈូកសឹងគ្រប់ខ្នងផ្ទះទៅហើយ ដោយសារឈូកឆាប់បានផល ហើយមិនពិបាកលក់ទេ ផលវាអាចជួយឲ្យកសិករមានជីវភាពល្អប្រសើរផងដែរ។

ដោយឡែក លោក អ៊ីវ លីហូវ មេឃុំព្រែកអាជី ក៏បានបញ្ជាក់ឲ្យដឹងដែរថា ក្នុងឃុំ មានភូមិចំនួន ៦ រួមមាន ភូមិទី១ ដល់ ភូមិទី ៦ ហើយប្រជាពលរដ្ឋទាំង ៦ ភូមិ បាននាំគ្នាដាំឈូកទាំងអស់គ្នាលើផ្ទៃដីជិត ៦០០ ហិតា។ កសិករក្នុងពេលបច្ចុប្បន្នពួកគាត់ចេះមើលឲ្យតែដំណាំណាមានទីផ្សារគឺដាំហើយ ដូចជា ឈូកនេះជាដើម។ ពួកគាត់ចេះឆក់ឱកាស រដូវនេសាទរកត្រី រដូវទឹកសម្រកធ្វើស្រែ និងបន្ថែមលើការងារចិញ្ចឹមសត្វទៀត ដើម្បីរកប្រាក់ចំណូលបន្ថែមក្នុងគ្រួសារ។ សម្រាប់ឆ្នាំ ២០២៥ នេះ កសិករសម្រុកបង្កើតការដាំដុះឈូកច្រើនជាងឆ្នាំមុនៗ ព្រោះឈូកស្រួលលក់ ហើយជីវភាពពួកគាត់ក៏ល្អប្រសើរជាងមុន៕

អត្ថបទ ៖ សាន វិឡែម